21-fevral kuni Ukraina prezidenti Vladimir Zelenskiy Polsha bosh vaziri Donald Tusk va prezident Anjey Dudani g‘alla bilan bog‘liq mojaroni hal qilish uchun Polsha-Ukraina chegarasiga taklif qildi. Bu haqda CNN xabar berdi.
Xabarga ko‘ra, Polshada fermerlar bilan bog‘liq jiddiy ijtimoiy vaziyat Ukrainada xavotir uyg‘otgan. Ukraina prezidenti idorasi zudlik bilan vaziyatni hal qilish yo‘llarini qidirgan.
“Men polshaliklarga murojaat qilishni hamda siyosiy manipulyatsiya va milliy xavfsizlik muammolarini bir-biridan farqlay oladigan barchaga minnatdorlik bildirishni xohlayman”, — deb yozgan Zelenskiy X'dagi sahifasida.
Vladimir Zelenskiy, shuningdek, Yevrokomissiyani chegaradagi yig‘ilishda ishtirok etish uchun o‘z vakilini yuborishga chaqirgan. Yevropa rasmiy vakili bo‘lishi muzokara uchun ijobiy ruh berishi ta'kidlangan.
“Bizning yerlarimizda Moskvaning borligi yetarli. Biz yetarlicha tushunmovchiliklardan o‘tdik. Biz bir-birimizni kamsitmasligimiz kerak, na ukrainalik, na polshalik fermerlar kamsitilmasligi lozim. Bizga hozir birdamlik kerak”, — degan Ukraina rahbari.
Polshada fermerlar noroziligini keltirib chiqargan omil arzon Ukraina donining mamlakatga kirib kelishi bo‘ldi. Polsha fermerlari Ukraina doni narxi bilan raqobatlasha olmagan. Natijada mahalliy mahsulot sotilmay qolgan va fermer xo‘jaliklari zarar ko‘ra boshlagan. Buning ortidan norozilik bildirayotgan fermerlar Polsha hukumati va Yevrokomissiyadan tovon puli talab qilishgan.
2022-yil may oyida Yevropa rahbariyati Ukraina eksportiga nisbatan barcha boj va kvotalarni vaqtincha olib tashladi. Natijada arzon don Yevropaga oqib kela boshladi.
Yevropa Komissiyasi Ukraina g‘allasining bojsiz va kvotasiz importini 2024-yil iyunigacha uzaytirish to‘g‘risidagi qaror loyihasini eʼlon qilganidan keyin esa mahalliy fermerlar g‘azabi kuchaygan.
Izoh (0)