Польша бош вазири Дональд Тускка нисбатан Туркия президенти Ражаб Тоййип Эрдўғоннинг қонунга мувофиқ рўйхатдан ўтказилмаган совғаси учун жиноий иш қўзғатилиши мумкин. Бу ҳақда Rzeczpospolita газетаси хабар бермоқда.
Март ойида Туск ижтимоий тармоқда Туркия президентининг совғасини халқлар ўртасидаги тинчлик ва дўстлик рамзи сифатида таърифлаб, унинг суратини суратини ўзининг Х ижтимоий тармоғидаги саҳифасида эълон қилган. Бу 1745 йилда Польша канцлери Анжей Станислав Залуский томонидан Усмонли империясининг бош вазири Саййид Ҳасан пошога Польшадан юборилган мактуб эди.
Нашрнинг эслатишича, Польша қонунчилигига кўра, минимал иш ҳақининг ярмидан (тахминан 197 доллар) ортиқ миқдордаги совға олган амалдор уни олган кундан бошлаб 30 кун ичида рўйхатдан ўтказиши шарт. Туск олган ноёб буюмнинг қиймати бу миқдорнинг ярмидан анча кўп. Шундай бўлсада, совға рўйхатдан ўтказилмаган.
Мақолага жавобан Польша ҳукумати ахборот маркази бош вазир томонидан олинган ҳужжат “Тускнинг шахсан ўзи учун эмас, балки Польша халқи учун совға” эканини ва у Музейлар кечасида Вазирлар Кенгаши раиси идорасида кўриш учун намойиш этилишини маълум қилди.
“Ҳозирда хат бош вазир девонхонасида сақланмоқда ва 17 май куни бўлиб ўтадиган Музейлар кечасида ташриф буюрувчилар учун намойиш этилади. Бош вазир томонидан Польша давлати номидан ва унинг манфаати йўлида олинган совғалар девонхона фондларида қолади ёки музейлар ёхуд бошқа давлат муассасаларига топширилади ҳамда Польша Республикаси бош вазири учун тўғридан-тўғри фойда келтирмайди”, дея газетага маълум қилди ҳукумат ахборот маркази.
Польша бош вазири қонунчиликка кўра, эътиборсизлиги туфайли уч йилгача озодликдан маҳрум қилиниши мумкин.
Изоҳ (0)