Rossiya nemis Taurus qanotli raketalarining Rossiya obyektlariga qarshi har qanday qo‘llanilishini Germaniyaning Ukrainadagi harbiy mojarodagi to‘g‘ridan-to‘g‘ri ishtiroki sifatida baholashini ma’lum qildi. Bu haqda Rossiya Tashqi ishlar vazirligi rasmiy vakili Mariya Zaharova bildirdi.
“Bundesver harbiy xizmatchilarining bevosita ko‘magisiz bu qanotli raketalardan jangovar o‘q uzish imkonsiz bo‘lgani sababli ular bilan Rossiyaning har qanday obyektlariga, muhim transport infratuzilmasiga zarba berilishi Germaniyaning jangovar harakatlardagi bevosita ishtiroki sifatida baholanadi”, deya ta’kidladi Zaharova.
Ushbu bayonot Germaniyaning ehtimoliy bo‘lajak kansleri Fridrix Mersning Yevropa Ittifoqidagi hamkorlar bilan kelishilgan holda Ukrainaga Taurus raketalarini yetkazib berishga tayyorligi haqidagi fikridan so‘ng yangradi. Mersning ta’kidlashicha, NATOning ayrim davlatlari, jumladan, AQSH, Buyuk Britaniya va Fransiya allaqachon Kiyevga qanotli raketalar yetkazib bermoqda. O‘z navbatida, Germaniya mudofaa vaziri Boris Pistorius bunday qadamga qarshi “ko‘plab asoslar” mavjudligini aytgan.
Taurus raketalari 500 kilometrdan ortiq masofani bosib o‘tish qobiliyatiga ega bo‘lib, ko‘priklar va chuqur joylashgan qo‘mondonlik bunkerlari kabi mustahkamlangan nishonlarni yo‘q qilishda yuqori aniqlikka ega ekanligi bilan tanilgan.
Germaniyaning amaldagi kansleri Olaf Shols ilgari Kiyevning ushbu raketalarni topshirish haqidagi so‘rovlarini bir necha bor rad etgan bo‘lib, o‘z pozitsiyasini mojaroning kuchayib ketishidan xavotirlanish bilan asoslagan.
Izoh (0)