Joriy yilning birinchi choragida Rossiyada tug‘ilish ko‘rsatkichi so‘nggi 200 yildagi eng past darajaga tushdi. Bu haqda “Agentstvo” nashri demograf Aleksey Raksha tahliliga tayanib xabar berdi.
Tahlillarga ko‘ra, 2025-yil martida tug‘ilish soni 2024-yilning xuddi shu davriga nisbatan 3-4 foizga kamaygan. Fevralda esa bu ko‘rsatkich 6-7 foizgacha tushgan. Raksha bu boradagi pasayishni jiddiy tahdid deb atab, hukumatning tug‘ilish ko‘rsatkichini oshirishga qaratilgan siyosati deyarli natija bermayotganini ta’kidladi.
Shunga qaramay, Rakshaning so‘zlariga ko‘ra, Rossiyada tug‘ilish darajasi hali ham qo‘shni davlatlar va Yevropaning bir qator mamlakatlariga qaraganda yuqoriroq. Nashr Finlyandiya, Germaniya, Gretsiya, Vengriya, Ruminiya hamda Yaponiya kabi davlatlarni bunga misol sifatida keltirgan.
Demograf joriy tendensiya davom etsa, bu Rossiya uchun qator salbiy oqibatlarga olib kelishidan ogohlantirgan. Jumladan, iqtisodiy o‘sish sekinlashadi, shuningdek, davlat pensiya yoshini ko‘tarishga majbur bo‘ladi.
Rossiya hukumati muammoni bartaraf etish uchun abort imkoniyatlarini cheklash, onalikni qo‘shimcha to‘lovlar bilan rag‘batlantirish kabi choralarni ko‘rmoqda. Ular orasida homilador o‘quvchi qizlarga nafaqa ajratish kabi bahs-munozaralarga sabab bo‘lgan qarorlar ham bor.
Izoh (0)