Erta uyg‘onish — bu oson ish emas. Ammo ko‘plab yulduzlar, yozuvchilardan tortib modellargacha va teleboshlovchilargacha kunlarini shu tarzda boshlaydilar. Quyoshning birinchi nurlari bilan uyg‘onadigan mashhurlar haqida va ularga bu nima uchun kerakligi haqida hikoya qilamiz.
Mashhurlar ko‘pincha tushgacha uxlashdan ko‘ra erta turishni afzal ko‘rishadi. Baʼzilarini odat va o‘zini tarbiyalash, boshqalarini esa shaxsiy falsafa boshqaradi. Mahsuldorligiga havas qilsa arziydigan to‘rg‘ay yulduzlarning hikoyalarini to‘pladik.
Haruki Murakami — rejim falsafa sifatida
Yaponiyalik yozuvchi Haruki Murakami soat 4:30 da juda erta uyg‘onadi. Uning uchun erta turish oddiy odat emas, balki yozuvchilik falsafasining bir qismidir. Yozuvchining hayotida jismoniy kuch va “kuchli” narsalarni yaratish qobiliyati o‘rtasida uzviy bog‘liqlik mavjud.
Kun boshida Murakami achchiq qahva qaynatib, besh-olti soat yozuvchilik bilan shug‘ullanadi. Va shundan keyingina u sport, o‘qish va boshqa ishlarga vaqt ajratadi. “Men har kuni bu rejimga amal qilaman. Takrorlash gipnoz qiladi va trans holatiga tushiradi. Bu ongning chuqurroq qatlamlariga yetib borish uchun muhim”, deydi yozuvchi.
Opra Uinfri — minnatdorlik bilan boshlangan tong
Opra Uinfri har kuni soat 6:02 da uyg‘onadi. Soat roppa-rosa 6 da emas, aynan shunday — budilniksiz ham turadi. Teleboshlovchining so‘zlariga ko‘ra, bu uning uyg‘onish uchun shaxsiy sehrli raqamidir.
Ertalab u o‘zida bor narsalar uchun olamga minnatdorlik bildiradi — bu uning kunni ijobiylik bilan boshlash usuli. Va shundan keyin Opra itlari bilan sayr qiladi, qahva ichib, shaxsiy fitnes zaliga boradi. Mashg‘ulotlardan so‘ng teleboshlovchi nonushtaga vaqt ajratadi, u har doim butun donli tostlar bilan tuxumdan iborat bo‘ladi. Ana shundan keyingina ishga kirishadi. Tashqi tomondan media magnatining hayoti chalkashroq ko‘rinadi, lekin aslida hamma narsa o‘z joyida.
Jennifer Lopez — tonggi mashg‘ulotlar va mazali nonushta
Ishonish qiyin, lekin bu yil Jey Lo 56 yoshga to‘ladi. Va aktrisaning aytishicha, yoshlik va go‘zallikni saqlashning kaliti uning kun tartibida. Jennifer har kuni soat 4:45 da mashg‘ulotga borish uchun uyg‘onadi. “ Men o‘zimni sinab ko‘rishdan qo‘rqmayman va har kuni yaxshilanib bormoqdaman”, deydi u.
Jey Lo qahva ichmaydi, lekin albatta oilasi bilan birga nonushta qilishga vaqt ajratadi. Uning tanlovi — foydali, ozuqaviy moddalarga boy mahsulotlar, masalan avakadoli tostlardan, granula va yangi mevalardan iborat.
Jennifer ish kunini boshlashdan oldin o‘ziga oro beradi va pardoz qiladi. Uydan chiqishdan oldin esa bir nechta ijobiy iboralarni aytadi. Uning so‘zlariga ko‘ra, o‘zingizning eng yaxshi versiyangiz bo‘lish uchun har kuni “tanangiz uchun tanlov qilishingiz va vaqtingizni to‘g‘ri taqsimlashingiz” kerak.
Viktoriya Bekhem — o‘zi uchun tong va jadvalga muvofiq hayot
Viktoriya soat 6 dan oldin uyg‘onadi — bu nafaqat rejimga sodiqlik, balki o‘ziga g‘amxo‘rlik qilishning bir lahzasidir. “Men o‘zim bilan yolg‘iz bo‘lish uchun vaqtga muhtojman va erta tong — buning yagona imkoniyati”, deydi u. Tadbirkor ayolning so‘zlariga ko‘ra, erta turish muammo emas, chunki u tabiatan to‘rg‘ay qushi kabidir.
Viktoriyaning tongi yugurish yo‘lida davom etadi. U kardio mashg‘ulotini ish elektron pochta xabarlarini ko‘rib chiqish bilan muvaffaqiyatli birlashtiradi. Keyin esa dush va ozuqaviy nonushta qabul qiladi. Bekhem xonimning sevimli retsepti — avokado bilan ko‘pirtirilgan tuxum oqi. “Men mazali va foydali taomni yaxshi ko‘raman”, deydi u.
Soat 9 atrofida Viktoriya ishga ketadi. Va ish kuni juda xilma-xil bo‘lishi mumkin, lekin “faqat ishxonada ishlash” qoidasi u uchun o‘zgarmasdir. Hech qanday qo‘shimcha ish soatlari yo‘q, aks holda, uning so‘zlariga ko‘ra, aqldan ozish mumkin.
Hamma narsa juda aniq va o‘ylangan. “Yoshingiz ulg‘aygan sayin, o‘zingizga ko‘proq g‘amxo‘rlik va eʼtibor berishingiz kerak”, deydi Viktoriya.
Erta uyg‘onish — bu faqat kundalik hayot emas, balki baʼzi yulduzlarning hayot qoidasidir. Albatta, bu hammaga ham mos kelmaydi. Ammo rejalashtirilgan aniq kun tartibi ko‘plab muvaffaqiyatli odamlarning hamrohi hisoblanadi.
Izoh (0)