Rossiya Oliy sudi “Tolibon” harakatini ekstremistik tashkilotlar ro‘yxatidan chiqarish haqida qaror qabul qildi. Bu haqda “RIA Novosti” xabar bermoqda.
“Rossiya Federatsiyasi Bosh prokuraturasining ma’muriy da’vosi qanoatlantirilsin”, deya qarorni e’lon qilgan sudya Oleg Nefedov.
Majlis yopiq tarzda o‘tkazilgan. Qaror darhol kuchga kirishi lozim, biroq uning ustidan shikoyat qilish mumkin.
Rossiya Bosh prokuraturasining tushuntirishicha, sudga murojaat qilishning huquqiy asosi sifatida dekabr oyida Ma’muriy sud ishlarini yuritish kodeksi va “Terrorizmga qarshi kurash to‘g‘risida”gi federal qonunga kiritilgan o‘zgartirishlar xizmat qilgan. Ushbu o‘zgartirishlar terrorchilik tashkiloti terrorizmni targ‘ib qilish, oqlash va qo‘llab-quvvatlashga yo‘naltirilgan faoliyatini yoki Rossiya manfaatlariga qarshi terrorchilik yo‘nalishidagi jinoyatlarni sodir etishni to‘xtatgan bo‘lsa, unga nisbatan taqiqni to‘xtatib qo‘yish imkonini beradi.
Qo‘shimcha qilinishicha, bu holatlar sud majlisida o‘z tasdig‘ini topgan va sud da’voning asosli ekani haqida xulosaga kelgan.
“Tolibon” Afg‘onistonda 2021-yil yoz oxiridan beri hokimiyatni boshqarmoqda. O‘shandan buyon ular Rossiyaga bir necha marta tashrif buyurishgan. Moskva mamlakatda shakllangan rahbariyatni rasman tan olmagan bo‘lsa-da, Qobul bilan hamkorlikni rivojlantirish uchun harakatni terrorchilik tashkilotlari ro‘yxatidan chiqarish rejalari haqida gapirgan.
“Tolibon” Rossiyada 2003-yil 14-fevralda Oliy sud qarori bilan taqiqlangan edi. Sud hujjatlarida 1994-yilda Afg‘onistonda tashkil topgan harakat Checheniston hududida faoliyat yuritgan noqonuniy qurolli guruhlar bilan aloqada bo‘lgani qayd etilgan.
2024-yilning dekabr oyida Vladimir Putin “Tolibon” Afg‘onistondagi qonuniy hokimiyat ekanini, shu bois Rossiya “mavjud voqelikdan kelib chiqib, munosabatlarni tegishli tarzda qurishi lozim”ligini ta’kidlagan. O‘sha yili Rossiya Tashqi ishlar vazirligi va Adliya vazirligi prezidentga “Tolibon”ni taqiqlangan tashkilotlar ro‘yxatidan chiqarish mumkinligi to‘g‘risida ma’lumot bergan.
O‘tgan yiling sentyabr oyida Qirg‘iziston “Tolibon” harakatini respublika hududida faoliyati taqiqlangan terroristik va ekstremistik tashkilotlar ro‘yxatidan chiqargandi.
“Tolibon” harakati terrorchilik faoliyati tufayli BMT sanksiyalari ostiga olingan.
Izoh (0)