Kuchli iroda, isteʼdod, ojiza bo‘lishiga qaramay, maqsad sari tirishqoqlik va qatʼiyatlilik ramzi — Tangem obrazi nafaqat o‘zbek, balki butun dunyo teletomoshabinlari qalbidan chuqur joy olgan. XV asr, Choson sulolasi hukmronligi davrida yashab o‘tgan qahramonni XXI asrda o‘z maromiga yetkazib ijro etib bera olgan aktrisa Li Yon E hozir 54 yoshda va hali ham faol ijod bilan shug‘ullanadi.
Ijoddagi ilk qadamlar
Aktrisa va model Li Yon E 1971-yil 31-yanvarda Janubiy Koreyaning Seul shahrida dunyoga kelgan. Bo‘lajak aktrisa nemis tili bo‘yicha bakalavr darajasini, shuningdek, Xanyan universitetida aktyorlik bo‘yicha magistr va doktorlik darajasini olgan. U nemis va ingliz tillarini mukammal biladi.
Li Yon o‘z faoliyatini televideniyeda reklama va seriallarda suratga tushib boshlagan. 2000-yilda u Pak Chanukning “Birlashgan xavfsizlik zonasi” filmida harbiy tergovchi rolini ijro etgan, filmda u bilan birga Li Byon Xon va Son Kanxo ham suratga tushgan. 2003-yilda aktrisa Yu Jithae bilan birgalikda “Bir bahorda” melodramasida bosh rolni ijro etgan. Ushbu filmdagi roli uchun Li Yon “Pusan kinotanqidchilari mukofoti”(Pusan Film Critics Awards)ning “Eng yaxshi aktrisa” nominatsiyasiga loyiq deb topilgan.
Shuningdek aktrisa “Xonimga rahm qiling: qasos” (2005), “Birlashgan xavfsizlik zonasi” (2000), “Bir bahorda” (2001) kabi filmlarda va “Saroy javohiri” (2003-2004) teleserialida bosh rollarni ijro etgan. “Xonimga rahm qiling: qasos” filmidagi roli uchun Li Yon “Moviy ajdarho” mukofotining “Eng yaxshi aktrisa” nominatsiyasida g‘olib bo‘lgan.
Mashhurlikning cho‘qqisi
2003-yilda Li Yon E to‘qsonta mamlakatda uch milliard kishi tomosha qilgan mashhur koreys teleseriali “Saroy javohiri”da bosh rolni o‘ynagan.
2005-yilda Gonkong aholisining deyarli yarmi dramaning final epizodini tomosha qilgan, Xitoyda esa drama kechasi namoyish etilganiga qaramay, yuz millionlab tomoshabinlar uni kuzatgan.
2005-yil, Venetsiya kinofestivalida Pak Chanukning qasos haqidagi trilogiyasining yakuniy qismida Li Yon bosh rolni ijro etgan “Xonimga rahm qiling: qasos” filmi taqdim etildi. Film kinofestivalida “Kichik oltin sher” mukofotini oldi, Koreyada esa “Eng yaxshi aktrisa” va “Eng yaxshi film” nominatsiyalarida “Moviy ajdarho” mukofotini qo‘lga kiritdi. 2006-yilda Yon E Berlindagi ellik oltinchi xalqaro kinofestivalning hakamlar hayʼati aʼzosi bo‘ldi. U Berlindagi kinofestivalning hakamlar hayʼatiga taklif etilgan birinchi janubiy koreyalik aktrisa edi.
Li Yon E xayriya ishlari bilan ham faol shug‘ullanadi: 1997-yilda u “NPO”ning xayriya elchisi sifatida Efiopiyaga borgan, 2004-yilda esa BMTning Bolalar fondi — YUNISEFning xayriya elchisi etib tayinlangan.
2014-yilda aktrisa “Eng buyuk sevgi” nomli avtobiografik kitobini nashr etgan va kitobning sotilishidan tushgan daromadni maktablar va kasalxonalarga xayriya qilgan.
10 yillik sevgi hikoyasi
Mashhur aktrisa Li Yon E 2009-yil 26-avgustda Gavayi orolida koreys millatiga mansub amerikalik biznesmen Chon Xoyo‘n bilan yashirincha turmushga qurdi, bu haqda uning advokatlari maʼlum qildi. To‘yda faqat ikki yoshning oila aʼzolari hamda yaqin do‘stlari ishtirok etdi.
Aktrisa turmush o‘rtog‘idan 17 yosh kichik bo‘lib, ular to‘ydan avval 10 yil davomida uchrashib yurishgan. Kuyov Illinoys texnologiya instituti bitiruvchisi va AQSHda IT sohasida ishlaydi. 40 yoshni qarshilagan aktrisa 2011-yilning fevral oyida o‘g‘il va qiz egizak farzandlarini dunyoga keltirdi.
Aktrisaning hayot haqidagi fikrlari
“Yuzdagi ajinlar qancha ko‘p bo‘lsa, his-tuyg‘ular shunchalik chuqur bo‘ladi. Men qariyotganimdan aslo afsuslanmayman.
So‘nggi 10 yil ichida men turmushga chiqdim va egizaklarni dunyoga keltirdim, ayol sifatida men ko‘plab o‘zgarishlarni boshdan kechirdim. Shu sababli hayotga bo‘lgan qarashim ham o‘zgardi va bu mening ishtirok etishni istagan ishlarni tanlashda mezonimga aylandi.
-eFHxO_qu.avif)
Aktyorlik bu oxir-oqibat, odamlarni o‘rganishdir”.
Li Yon E O‘zbekiston birinchi xonimidan minnatdorchilik maktubini oldi
2017-yil 23-noyabr kuni O‘zbekiston prezidenti Shavkat Mirziyoyev va uning rafiqasi Ziroatxon Mirziyoyeva sharafiga Janubiy Koreya prezidenti qarorgohida kechki ovqat uyushtirildi. Kechki ovqatga sanʼat va madaniyat arboblari qatorida o‘zbek tomoshabinlariga “Saroy javohiri” serialidagi Tangem obrazi orqali yaxshi tanish bo‘lgan 46 yoshli aktrisa Li Yong E ham tashrif buyurdi. Janubiy Koreya matbuotining yozishicha, kechki ovqat vaqtida “Saroy javohiri” serialidagi Tangem tayyorlagan ovqatlardan biri ham mehmonlarga tortildi. Marosimda serialdagi “Onara” qo‘shig‘i ham ijro etildi.
Li Yon E O‘zbekiston birinchi xonimidan o‘zbekistonlik tomoshabinlariga ko‘rsatgan xizmatlari uchun minnatdorlik maktubini oldi. Uning agenti maʼlumot berishicha, O‘zbekiston prezidenti Shavkat Mirziyoyevning rafiqasi Ziroatxon Mirziyoyeva aktrisaga iyun oyida yuborgan maktubida 2017-yilda suratga olingan va O‘zbekistonda bepul namoyish etilishi uchun mualliflik huquqlarini topshirilgan “Saymdan, ranglar xotirasi” deb nomlangan yuqori byudjetli Koreya dramasini taqdim etishda yordam bergani uchun minnatdorlik bildirgan.
Birinchi xonim maktubida Lining “O‘zbekistonda serialni namoyish etishga ko‘maklashgani” haqida eshitishdan “juda xursand” ekanligini yozgan. U aktrisaning bu harakatini “aʼlo” deb atagan va u “ayniqsa COVID-19 pandemiyasi davrida yanada muhim” ekanligini aytgan. “Men Lining O‘zbekistonga bo‘lgan mehr-muhabbatidan har doim xursandman va minnatdorman. Lining yaxshi ishlari bizni chuqur taʼsirlantirdi”, deb qo‘shimcha qilgan birinchi xonim.
2017-yilning yanvaridan mayigacha Koreyada namoyish etilgan serialda Li Yon E Choson davri xonimi Shin Saymdan rolini ijro etgan. U Koreya tarixida sanʼat va adabiyotdagi isteʼdodi, shuningdek, hurmatli beka va ona sifatida namuna ko‘rsatgan ayol hisoblanadi. “Saymdan, ranglar xotirasi” deyarli 22 milliard von (18,2 million dollar)ga tushgani sababli uni ishlab chiqaruvchi Group Eight daromad olish maqsadida mualliflik huquqlarini xalqaro bozorda sotishni boshladi.
Firma, shuningdek, O‘zbekistonga ham mualliflik huquqlarini sotishga harakat qilgan, ammo Li o‘z rahbarlarini “mualliflik huquqlarini xayriya qilishga” ko‘ndirishga “qattiq” harakat qilgan. Aktrisa, ayniqsa, Markaziy Osiyodagi 600 000 etnik koreys, shu jumladan, O‘zbekistondagi 200 000 kishini Koreya va uning madaniyati haqida dramalar orqali ko‘proq maʼlumot olishga yordam berishni xohlagan. U serial O‘zbekistonda namoyish etilishi uchun serialning dublyaj qilinishi va boshqa tegishli choralar uchun shaxsan 100 million vondan ortiq mablag‘ sarflagan.
Izoh (0)