Netflix platformasida namoyish etilgan “Kalmar o‘yini” serialining mashhurligi va muvaffaqiyati ortida aktyorlarning uzluksiz mehnati, ba’zida esa salomatligiga zarar yetadigan darajadagi fidokorona mehnati yashiringan. Ushbu serialda rol ijro etgan bir qancha aktyorlar suratga olish ishlari tugaganidan so‘ng turli ruhiy muammolarga duch kelgan.
Quyida “Kalmar o‘yini” aktyorlarining rolga kirish jarayoni qanday kechgani va serial tufayli ularning psixologik holati qanchalik o‘zgargani haqida to‘xtalamiz.
Li Jong Je
Serial bosh qahramoni Son Ki Xun obrazini yaratgan Li Jong Je bugungi kunda Koreya kino sanoatining eng mashhur yulduzlaridan biriga aylangan. Ammo aktyor birinchi mavsum suratga olish ishlari tugagach, chuqur ruhiy tushkunlikka tushib qolgan. U tun yarmida uyg‘onib, sovuq terga botar, serialdagi o‘yinlar bilan bog‘liq dahshatli tushlar ko‘rgan.
“Men obrazga shu qadar kirishib ketdimki, suratga olish ishlari tugaganidan so‘ng ham uzoq vaqt davomida undan ajrala olmadim. Bo‘lib o‘tgan voqealar, og‘riqli hodisalar, qonli kadrlar va umidsizlik meni juda ezib yuborgan edi”, deydi aktyor.
Uning so‘zlariga ko‘ra, ushbu murakkab rol uni nafaqat jismonan, balki ruhiy jihatdan ham toliqtirgan.
Pak Xe Su
Serialdagi yana bir yodda qoladigan obraz Cho San Vu bo‘lib, uni aktyor Pak Xe Su ijro etgan. Uning qahramoni aqlli, mulohazali, ammo o‘z yo‘lini yo‘qotgan, g‘alaba uchun hamma narsani qurbon qilishga tayyor inson. Aktyor bu murakkab xarakterni chuqur o‘rganishga harakat qilgan, obrazning ichki kurashi va ziddiyatlarini chuqur tahlil qilgan. 2022-yil yanvar oyida jurnalistlarga bergan intervyusida:
“Obrazdan o‘zimni ajratib olish juda og‘ir bo‘ldi. Suratga olish ishlari tugaganidan keyin ham Cho San Vu haqidagi o‘ylar meni tark etmadi. Men uning harakatlarini oqlashga, tushunishga harakat qildim. Bu holat yuragimda bosim bo‘lib turaverdi”, dedi aktyor.
Pak Xe Sun tushlarida ham serialdagi o‘yinlarni ko‘rganini, odamlar gavjum joylarda o‘zini noqulay his qilganini aytib, psixologdan yordam so‘rashga majbur bo‘lgan.
Chon Xo Yon
Serial orqali katta mashhurlikka erishgan model va aktrisa Chon Xo Yon esa muvaffaqiyat ortidan kelgan bosimni ko‘tara olmagan. U bir hafta ichida stress tufayli 2,7 kilogramm vazn yo‘qotgan. Muxlislar uning holatidan jiddiy xavotir olishgan, biroq aktrisa keyinchalik sog‘lig‘ini tiklashga muvaffaq bo‘lgan. Uning ta’kidlashicha, to‘satdan kelgan mashhurlik uni ovqatlanish va hatto suv ichish istagidan butunlay mahrum qilgan.
Xo Son Te
Serialda jinoyatchi rolini mahorat bilan ijro etgan aktyor Xo Son Te esa mashhurlik ortidan og‘ir psixologik bosimga duch kelgan. U hatto oddiy odamlar bilan muloqot qilishdan ham qo‘rqib qolgan. Bu holat uning keyingi loyihasi — “Yolg‘iz qirmizi yurak” serialiga salbiy ta’sir ko‘rsatgan. Aktyor hatto o‘z obrazining qizi bilan suhbatlashishi kerak bo‘lgan sahnani bekor qilishni so‘ragan, chunki insonlar bilan gaplashish uni qo‘rqitib qo‘ygan edi. Yaxshiyamki, rejissyor uning holatini tushunib, Xo Son Tega yordam bergan va asta-sekin aktyorning ruhiy ahvoli tiklana boshlagan.
O Yon Su
Aktyor O Yon Su serialdagi rolidan so‘ng xalqaro miqyosda mashhurlikka erishgan. Ammo bu shon-shuhrat uni noaniq bir holatga solib qo‘ygan. Aktyor suratga olish ishlari tugaganidan so‘ng, ichki bo‘shliq hissi uni qamrab olganini aytgan:
“Men o‘zimni go‘yo havoda muallaq qolgandek his qilyapman. O‘zimni tinchlantirishim, fikrlarimni yig‘ishim va o‘nglab olishim kerak.”
Biroq aktyorning hayotiy tajribasi va donoligi uni bu holatdan tezda olib chiqqan. “Kalmar o‘yini” ayni damda uning so‘nggi loyihasi sanaladi. Ushbu roli uchun u nufuzli “Oltin globus” mukofotini qo‘lga kiritgan.
Izoh (0)