Rossiya va Xitoy boshqa davlatlarga murojaat qilib, Koreya Xalq Demokratik Respublikasiga nisbatan kuch ishlatish orqali bosim o‘tkazishdan voz kechishga chaqirdi. Bu haqda Kreml saytida e’lon qilingan G‘alabaning 80 yilligini nishonlash munosabati bilan hamkorlikni yanada chuqurlashtirish to‘g‘risidagi ikki davlatning qo‘shma bayonotida ma’lum qilingan.
Ta’kidlanishicha, Rossiya va Xitoy “tegishli davlatlar”ni bir tomonlama sanksiyalar va kuch ishlatish orqali bosim o‘tkazishdan, shuningdek, Shimoli-Sharqiy Osiyoni harbiylashtirish va u yerda qarama-qarshilikni keltirib chiqarish siyosatidan voz kechishga chaqirmoqda. Buning o‘rniga Koreya yarim orolidagi keskinlikni yumshatish choralarini ko‘rishga undamoqda.
“Tomonlar Koreya yarimorolidagi muammolarni hal qilishning majburiy sharti suverenitetni o‘zaro hurmat qilish va jalb qilingan davlatlarning milliy manfaatlarini muvozanatli hisobga olish ekanligiga ishonch bildirmoqda”, deyiladi bayonotda.
Shuningdek, Rossiya va Xitoy yarimoroldagi muammolarni hal qilish va Shimoli-Sharqiy Osiyoda uzoq muddatli tinchlik va barqarorlikka erishishga hissa qo‘shishga tayyorligini bildirdi.
Rossiya birinchi marta KXDRning Kursk viloyati uchun bo‘lgan janglardagi ishtirokini rasman tan olgan edi. Prezident Vladimir Putin Shimoliy Koreya jangchilariga minnatdorchilik bildirib, ularning harakatlari xalqaro huquqqa to‘liq muvofiq bo‘lganini, shuningdek, 2024-yil iyun oyida imzolangan Keng qamrovli strategik sheriklik to‘g‘risidagi shartnomaga mos kelganini ta’kidlagandi.
Izoh (0)