“Titanik” 1912-yil 14-apreldan 15-aprelga o‘tar kechasi cho‘kib ketgan. Afsonaviy kemaning halokatga uchraganiga 113 yil to‘lishi munosabati bilan Rouz va Jekning taqdiri kabi hayratlanarli bo‘lgan haqiqiy sevishgan juftliklar haqida eslashga qaror qildik.
Rejissyor Jeyms Kemeronning aytishicha, bu personajlar to‘qib chiqarilgan. Biroq film qahramonlariga asos bo‘lishi mumkin bo‘lgan haqiqiy odamlarning sevgi tarixlari ham bor.
“SOS!” hayqirig‘i ostida turmush qurish taklifi
“Titanik” yo‘lovchilari orasida mashhur tennischi Karl Ber va uning sevgilisi Helen Nyusom ham bor edi. Gazetalarning yozishicha, aynan o‘sha mash’um kechada Karl Helenga turmush qurishni taklif qilgan. Qiz badavlat oiladan bo‘lib, onasi qizi uchun o‘zi tengi boy kuyov topilishini orzu qilardi.
Helen tennischiga ko‘ngil qo‘yganda onasi bunga qarshi chiqadi. Qizini chalg‘itish maqsadida uni Yevropa bo‘ylab sayohatga olib ketadi. Biroq qaysar Karl ham sevgilisining izidan qolmay ergashadi. Helenning “Titanik”da Amerikaga qaytayotganini eshitgach, u ham o‘sha kemaga chipta xarid qiladi.
To‘qnashuv yuz berganda sportchi kayutaga yugurib, ayollarni qayiq palubasiga olib chiqadi. “Uayt Star Layn” kompaniyasi rahbari Bryus Ismey shaxsan Karlga qayiqdan joy taklif qilganda, sevishganlar abadiy xayrlashishga tayyor edi. Bir yil o‘tgach, Karl va Helen turmush qurishadi, ularning uchta o‘g‘li va bir qizi dunyoga keladi.
Cho‘kib ketgan to‘y sovg‘alari
1912-yil 21-aprelda, falokatdan olti kun o‘tgach, The New York Times gazetasida Edvard va Etel Binlarning tarixi e’lon qilinadi. Falokatdan bir necha yil oldin tosh teruvchi Edvard Amerikaga ko‘chib kelgan, xizmatkor bo‘lib ishlaydigan qallig‘i Etel esa Angliyada qolgan edi. Ular o‘z vatanlarida nikohdan o‘tib, bir oydan so‘ng er xotinini yangi uyiga olib ketadi.
Ular “Titanik”da ikkinchi darajali yo‘lovchilar sifatida sayohat qilishayotgan edi. Kema halokatga uchraganda Edvard xotinini qutqaruv qayig‘iga o‘tqazishga yordam beradi, ammo “Faqat ayollar!” degan hayqiriqlarni eshitib, o‘zi orqaga chekinadi. Biroq qayiq uzoqlashgach, uning yarmi bo‘sh ekanligini ko‘rib, o‘zini suvga tashlaydi. Etel erini qayiqqa tortib oladi. Binlar oilasining barcha mol-mulki, jumladan, 65 ta to‘y sovg‘asi ham suv qa’riga cho‘kib ketadi, ammo o‘zlari tirik qolishadi.
Fojiadan tug‘ilgan farzand
Elen Uoker aysberg bilan to‘qnashuvdan oldingi kechada homila sifatida paydo bo‘lganiga ishonadi. “Bu men uchun juda muhim”, degandi u suhbat chog‘ida. Uning ota-onasi Angliyada zargarlik do‘konining egasi bo‘lgan 39 yoshli Semyuel Morli va uning ishchilaridan biri — 19 yoshli Keyt Fillips edi. Bir muddat oldin ular o‘rtasida sevgi paydo bo‘lgan va Morlining xotini hamda 12 yoshli qizi borligiga qaramay, Semyuel oilasini tark etib, Keyt bilan Amerikaga jo‘nashga qaror qilgandi. U yerda ular yangi hayot boshlashlari mumkin edi.
Ular “Titanik”ka mister va missis Marshall sifatida soxta familiya bilan chiqishadi. Fojia yuz berganda Keyt qutqaruv qayig‘iga o‘tiradi. Semyuel uning ortidan suvga sakraydi, biroq suzishni bilmagani uchun cho‘kib ketadi.
Sevgilisidan xotira sifatida Keytda unga sayohat paytida sovg‘a qilingan sapfir marjon qoladi. 1913-yil 11-yanvarda esa u qiz farzand ko‘radi.
Elen umr bo‘yi tug‘ilganlik guvohnomasiga Semyuel Morlining ismi yozilishi uchun harakat qiladi, ammo bunga erisholmaydi. U 2006-yilda vafot etadi. So‘nggi vasiyatiga ko‘ra, uning kuli dengizga sepiladi: u shunday qilib otasi bilan birlashishni istardi. Elenni yaxshi bilgan “Titanik” tadqiqotchisi Sin Shmeltsning ta’kidlashicha, aynan uning ota-onasi tarixi, shuningdek, marjon voqeasi film ijodkorlarini ilhomlantirgan.
“Sen qayerda bo‘lsang, men ham o‘sha yerda bo‘laman”
“Titanik” kemasi birinchi klassida mashhur tadbirkor Isidor Shtraus rafiqasi Ida bilan sayohat qilayotgan edi. U Amerikaning eng yirik do‘konlari tarmog‘ining hamta’sischilaridan biri edi. Shtrauslar 40 yildan beri er-xotin bo‘lib, har bir ishda hamkor edilar: Ida Isidorga biznesda va kongressmenlik faoliyatida yordam berardi, Isidor esa unga uy yumushlari va xayriya ishlarida ko‘maklashardi. Ular “Titanik”da Germaniyadan uylariga qaytishayotgan edi. Guvohlarning so‘zlariga ko‘ra, kema zobiti Shtrauslar juftligiga qutqaruv qayig‘iga o‘tirishni taklif etganda Isidor kemada qolayotgan boshqa erkaklarning taqdirini baham ko‘rishga qaror qilib, bu taklifni rad etgan.
Eri Idani qayiqqa o‘tqizmoqchi bo‘lganda u shunday deydi: “Sen qayerda bo‘lsang, men ham o‘sha yerda bo‘laman. Biz har doim birga bo‘lganmiz, birga o‘lamiz ham”. Eri unga bolalarni o‘ylashini aytadi, ammo Ida: “Ular tushunishadi”, deb javob beradi va xuddi filmdagi Rouz singari palubaga sakrab chiqadi. Shtrauslar o‘z o‘rinlariga oqsochlarini qayiqqa o‘tqazishadi. Isidorning jasadi nikoh uzugidan aniqlanadi, Idaning jasadi esa topilmaydi.
Izoh (0)