AQSH rahbari Donald Tramp o‘zidan oldingi prezident Jo Baydenning farzandlarini davlat qo‘riqchilaridan mahrum qildi. U bu haqda o‘zining Truth Social ijtimoiy tarmog‘ida yozdi.
Bugundan boshlab Hanter Bayden Maxfiy xizmat himoyasidan mahrum bo‘ladi. Shuningdek, 13 nafar agent qo‘riqlayotgan Eshli Bayden ham ro‘yxatdan chiqariladi, deb yozdi Tramp.
AQSH prezidentining ma’lum qilishicha, Hanterni shu paytgacha 18 nafar agent qo‘riqlagan. Xavfsizlik xizmati xodimlariga maosh soliq to‘lovchilar hisobidan to‘langan.
Odatda Maxfiy xizmat prezident o‘z lavozimini tark etgach, uning voyaga yetgan oila a’zolarini qo‘riqlashni to‘xtatadi. Faqat sobiq rahbarlar va ularning turmush o‘rtoqlari umrbod qo‘riqlanish huquqiga ega bo‘ladi.
Biroq yanvar oyida vakolatini topshirishdan oldin Bayden o‘zining voyaga yetgan farzandlari uchun Maxfiy xizmat qo‘riqlovini iyulgacha uzaytirish to‘g‘risidagi farmonni imzolagan. Tramp ham birinchi muddatdan so‘ng lavozimini tark etishidan oldin voyaga yetgan farzandlari — kichik Donald, Ivanka, Erik, Tiffani va ularning ikki turmush o‘rtog‘ini qo‘riqlashni olti oyga uzaytirgan edi.
Vakolatini topshirishdan oldin Bayden noqonuniy qurol saqlash va soliq qonunchiligini buzganlikda ayblangan o‘g‘lini ham afv etgan. Biroq AQSHning amaldagi rahbari sobiq prezident tomonidan chiqarilgan barcha afv hukmlarini yaroqsiz deb e’lon qilmoqchi.
Uyquchi Jo tomonidan Vakillar palatasining maxsus qo‘mitasi a’zolariga berilgan afv etishlar to‘g‘risidagi farmonlar qonuniy kuchga emas, chunki ular avtomatik imzolash qurilmasi yordamida tayyorlangan, degan Tramp.
Uning ta’kidlashicha, Bayden bu hujjatlarni imzolashga rozilik bermagan. Avvalo, gap 2021-yil 6-yanvarda Kapitoliyga bostirib kirish voqealarini tergov qilgan maxsus qo‘mita a’zolari uchun berilgan afv haqida bormoqda. Endi Tramp ushbu qo‘mita a’zolariga nisbatan tergov boshlashini e’lon qildi.
Izoh (0)