AQSH prezidenti Donald Tramp yadroviy davlatlarni yadro qurolidan voz kechishga chaqirdi va Rossiya hamda Xitoy bilan yadrosizlanish bo‘yicha muzokaralarga umid bildirdi. Bu haqda Newsweek xabar berdi.
Trampdan Fransiya prezidenti Emmanuel Makronning Yevropa davlatlariga Fransiyaning yadroviy himoyasini taklif qilishga tayyorligi haqidagi bayonotiga izoh berish so‘ralgan.
Agar hamma o‘z yadro qurolidan xalos bo‘lsa, juda yaxshi bo‘lardi. Bilasizmi, Rossiya va AQSHda, shubhasiz, eng ko‘p jangovar kallaklar bor. Xitoyda ham to‘rt-besh yil ichida shuncha qurol bo‘ladi. Agar barchamiz yadro qurollaridan xalos bo‘lishni amalga oshira olsak, juda yaxshi bo‘lardi, chunki yadro qurolining kuchi aql bovar qilmaydigan darajada dahshatli, dedi Tramp.
AQSH prezidenti ta’kidlashicha, u o‘zining birinchi prezidentlik muddati davomida yadrosizlanish dasturini amalga oshirishga harakat qilgan va Rossiya bilan muzokaralarda bu masalada “juda oldinga siljigan”. Shuningdek, buni Xitoy rahbari Si Szinpin bilan muhokama qilgan. Trampning aytishicha, Si Szinpin “bunga rozilik berishdan juda mamnun bo‘lardi”.
Ammo AQSH rahbari keyinchalik “yomon voqealar sodir bo‘lgani”ni aytdi. Unga ko‘ra, 2020-yilgi prezidentlik saylovlarida Jo Bayden g‘alaba qozondi.
Shu sababli, to‘rt yildan so‘ng bu masalaga qaytishga majbur bo‘ldik. Ammo men bu muzokaralarni boshlashni juda istardim, dedi u.
Amerika olimlari federatsiyasi (FAS) ma’lumotlariga ko‘ra, 12 mingdan ortiq yadro kallaklari mavjud. Ularning 90 foizi Rossiya va AQSH hissasiga to‘g‘ri keladi. 2024-yil avgust holatiga ko‘ra, Rossiyada 5580 ta, AQSHda esa 5044 ta yadroviy kallak bor. Boshqa davlatlarning yadro kallaklari soni esa suratda aks etgan.
Izoh (0)