Toshkent shahrida avtobuslarda yo‘l haqini to‘lamagan yo‘lovchilarga jarima qo‘llanmoqda. Bu haqda Transport vazirligi xabar berdi.
Qayd etilishicha, Transport nazorati inspeksiyasi inspektorlari va Yo‘lovchi tashishni monitoring va nazorat qilish davlat muassasasi nazoratchilari tomonidan, avtobuslarda yo‘l haqini to‘lamasdan harakatlanayotgan yo‘lovchilarga nisbatan kuchaytirilgan reyd tadbirlari olib borilmoqda.
Birgina 2025-yilning 2-aprel kuni davomida chiptasiz harakatlangan 162 nafar yo‘lovchiga ma’muriy bayonnomalar rasmiylashtirildi.
Ma’muriy javobgarlik to‘g‘risidagi kodeksning 144-moddasi 5-bandiga asosan, yo‘lovchining shahar ichida va shahar atrofiga qatnaydigan avtobusda chiptasiz yurishi bazaviy hisoblash miqdorining o‘ndan bir qismi miqdorida jarima solishga sabab bo‘ladi.
“Hurmatli yo‘lovchilar!
Yo‘l haqini bir martalik QR-chipta yordamida amalga oshirganingizda to‘lovingizni isbotlovchi QR-chiptani safar davomida o‘zingizda saqlab qolishni unutmang! Nazoratchi yoki inspektorlarning tekshiruvida ularning so‘roviga asosan mazkur chiptani ko‘rsatishingiz lozim.
Barcha yo‘lovchilardan avtobuslarda yo‘l haqini o‘z vaqtida to‘lashlarini so‘rab qolamiz”, deyiladi xabarda.
Yanvar oyida jamoat transportida ATTO transport va virtual kartalari orqali 15,2 million to‘lov amalga oshirildi: avtobuslarda — 11,7 million, metropolitenda — 3,5 million. Yo‘lovchilar esa yanvar oyi mobaynida o‘tish tariflari orqali 3,2 milliard so‘m tejagan.
Avvalroq Farg‘ona viloyati hokimining qarori bilan shaharlarda, shahar yo‘lovchilar transportida yo‘lovchilar va bagaj tashish xizmatlarining cheklangan tarifi belgilanayotgani haqida xabar berilgandi:
- avtobuslarda bir nafar yo‘lovchi uchun yo‘l haqi 3 ming so‘m;
- jamoat transportida naqd pulsiz to‘lov tizimini jozibadorligini oshirish, mazkur tizimdan foydalanishda yo‘lovchilarni keng jalb qilish, sohadagi yashirin iqtisodiyot ulushini kamaytirish maqsadida avtobuslarda elektron shaklda to‘langan to‘lovlar (transport kartasi, ATTO, bank kartalar) orqali bir nafar yo‘lovchi uchun bir martalik rag‘batlantiruvchi yo‘l haqi tarifi 2 ming 400 so‘m yo‘nalishli taksi (mikroavtobus)larda bir nafar yo‘lovchi uchun 4 ming so‘m.
Avtobuslarda “kunlik planlar”ning bekor bo‘lishi
Toshkentda 2023-yilning 5-mayidan boshlab, 5, 11, 18, 19, 37, 44, 67, 77, 83, 136, 139, 142, 72 va 81-sonli poytaxt bo‘ylab harakatlanuvchi avtobus yo‘nalishlarida xizmat ko‘rsatish yangi turdagi brutto-shartnoma asosida tashkil etilgan. Iyul oyida esa poytaxtdagi 32 ta avtobus yo‘nalishida “kunlik plan” bekor qilingandi.
Brutto-shartnomalar — bu yo‘lovchi tashishni tashkil etish modeli bo‘lib, unda barcha tushumlar shahar byudjetining maxsus hisob raqamiga o‘tkaziladi va shahar maʼmuriyati yo‘lovchi tashuvchiga yo‘nalishlar bo‘yicha to‘lovlarni bajarilgan ish hajmidan kelib chiqib, sifat nazorati ostida o‘tkazib beradi.
Qulay tariflar
Mazkur qaror bilan jamoat transportidan foydalanishda yo‘lovchilar uchun qulay tariflarni joriy etish belgilangan. Gap bir soat ichida bir yo‘nalishli yo‘lovchi transportidan boshqasiga o‘tish sonidan kelib chiqqan holda imtiyozli va bepul tariflar qo‘llanishi haqida ketmoqda.
Bundan tashqari, yo‘nalishli yo‘lovchi transportidan foydalanishda, uning turidan qat’i nazar, kunlik, bir, uch va olti oylik, yillik cheklangan va cheklanmagan tarif rejalari joriy etilishi kutilmoqda. Yo‘nalishlarda yo‘lkira haqini to‘lashda elektron to‘lov tizimidan foydalanishni rag‘batlantiruvchi tariflar belgilanadi.
Izoh (0)