Тошкент шаҳрида автобусларда йўл ҳақини тўламаган йўловчиларга жарима қўлланмоқда. Бу ҳақда Транспорт вазирлиги хабар берди.

Қайд этилишича, Транспорт назорати инспекцияси инспекторлари ва Йўловчи ташишни мониторинг ва назорат қилиш давлат муассасаси назоратчилари томонидан, автобусларда йўл ҳақини тўламасдан ҳаракатланаётган йўловчиларга нисбатан кучайтирилган рейд тадбирлари олиб борилмоқда.
Биргина 2025 йилнинг 2 апрель куни давомида чиптасиз ҳаракатланган 162 нафар йўловчига маъмурий баённомалар расмийлаштирилди.
Маъмурий жавобгарлик тўғрисидаги кодекснинг 144-моддаси 5-бандига асосан, йўловчининг шаҳар ичида ва шаҳар атрофига қатнайдиган автобусда чиптасиз юриши базавий ҳисоблаш миқдорининг ўндан бир қисми миқдорида жарима солишга сабаб бўлади.
“Ҳурматли йўловчилар!
Йўл ҳақини бир марталик QR-чипта ёрдамида амалга оширганингизда тўловингизни исботловчи QR-чиптани сафар давомида ўзингизда сақлаб қолишни унутманг! Назоратчи ёки инспекторларнинг текширувида уларнинг сўровига асосан мазкур чиптани кўрсатишингиз лозим.
Барча йўловчилардан автобусларда йўл ҳақини ўз вақтида тўлашларини сўраб қоламиз”, дейилади хабарда.
Январь ойида жамоат транспортида ATTO транспорт ва виртуал карталари орқали 15,2 миллион тўлов амалга оширилди: автобусларда — 11,7 миллион, метрополитенда — 3,5 миллион. Йўловчилар эса январь ойи мобайнида ўтиш тарифлари орқали 3,2 миллиард сўм тежаган.
Аввалроқ Фарғона вилояти ҳокимининг қарори билан шаҳарларда, шаҳар йўловчилар транспортида йўловчилар ва багаж ташиш хизматларининг чекланган тарифи белгиланаётгани ҳақида хабар берилганди:
- автобусларда бир нафар йўловчи учун йўл ҳақи 3 минг сўм;
- жамоат транспортида нақд пулсиз тўлов тизимини жозибадорлигини ошириш, мазкур тизимдан фойдаланишда йўловчиларни кенг жалб қилиш, соҳадаги яширин иқтисодиёт улушини камайтириш мақсадида автобусларда электрон шаклда тўланган тўловлар (транспорт картаси, ATTO, банк карталар) орқали бир нафар йўловчи учун бир марталик рағбатлантирувчи йўл ҳақи тарифи 2 минг 400 сўм йўналишли такси (микроавтобус)ларда бир нафар йўловчи учун 4 минг сўм.
Автобусларда “кунлик планлар”нинг бекор бўлиши
Тошкентда 2023 йилнинг 5 майидан бошлаб, 5, 11, 18, 19, 37, 44, 67, 77, 83, 136, 139, 142, 72 ва 81-сонли пойтахт бўйлаб ҳаракатланувчи автобус йўналишларида хизмат кўрсатиш янги турдаги брутто-шартнома асосида ташкил этилган. Июль ойида эса пойтахтдаги 32 та автобус йўналишида “кунлик план” бекор қилинганди.
Брутто-шартномалар — бу йўловчи ташишни ташкил этиш модели бўлиб, унда барча тушумлар шаҳар бюджетининг махсус ҳисоб рақамига ўтказилади ва шаҳар маъмурияти йўловчи ташувчига йўналишлар бўйича тўловларни бажарилган иш ҳажмидан келиб чиқиб, сифат назорати остида ўтказиб беради.
Қулай тарифлар
Мазкур қарор билан жамоат транспортидан фойдаланишда йўловчилар учун қулай тарифларни жорий этиш белгиланган. Гап бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тарифлар қўлланиши ҳақида кетмоқда.
Бундан ташқари, йўналишли йўловчи транспортидан фойдаланишда, унинг туридан қатъи назар, кунлик, бир, уч ва олти ойлик, йиллик чекланган ва чекланмаган тариф режалари жорий этилиши кутилмоқда. Йўналишларда йўлкира ҳақини тўлашда электрон тўлов тизимидан фойдаланишни рағбатлантирувчи тарифлар белгиланади.
Изоҳ (0)