Zamonaviy dunyoni IT’siz tasavvur qilish mushkul. Dasturchilar, kiberxavfsizlik mutaxassislari va sohaning boshqa vakillari raqamli olamning poydevorini yaratadi. “Daryo”ning navbatdagi mehmoni 7 yillik tajribaga ega grafik dizayner Madina Mavlonova. U bugungi kunda “Qizlar akademiyasi” loyihasida grafik dizayn yo‘nalishida mentor bo‘lib ishlaydi, Logo&Branding kursi muallifi, IT Ladies Uzbekistan jurnali yuzi hamda Yulduz Tech Awards taqdirlanuvchisi.
“Yosh ustozimning kompyuterni yaxshi tushunishi menga motivatsiya bo‘lgan”
— Biz oilada to‘rt kishimiz — dadam, oyim, men va ukam. Bolaligimdan bunday soha borligini ham bilmasdim aslida. Qizlar qiziqadigan shifokorlik, tarjimonlik va aktrisalik kasblariga men ham qiziqardim.
Maktabda informatika ustozimiz TATUni bitirib kelgan yosh qiz bo‘lishiga qaramay, kompyuterni juda yaxshi tushunardi. Qiz bola bo‘la turib, texnikani yaxshi bilishi menga motivatsiya bo‘lgan va men ham unga o‘xshashni xohlaganman. Maktabni tamomlagach, 2017-yilda texnika kasb-hunar kollejida kompyuter yo‘nalishiga o‘qishga kirdim. Bu yerga kirishimning yana bir sababi uyimizga yaqinligida ham edi. Chunki onam meni uzoqroq joyga bir o‘zimni yuborishga o‘rganmagandi. U meni tibbiyot yo‘nalishida ketishimni xohlagan, sababi ko‘p qarindoshlarim shifokor edi. Lekin oilamdan juda qattiq bosim bo‘lmagan, deydi Madina.
“Ilk kompyuterimni o‘zim sotib olganman”
— Kollejda 2-kursda amaliyot o‘tash uchun fotostudiyaga borganman. Kompyuterni yaxshiroq o‘rganish uchun menga faqat shu fotostudiya to‘g‘ri kelgan. Amaliyotni yaxshi o‘zlashtirganim uchun darsdan so‘ng shu yerda ishlashingiz mumkin, pulini to‘laymiz degan taklif berishgan. U yerdan kuniga 25 ming so‘m topardim. Shundan besh ming so‘mi kunlik xarajatim, ya’ni avtobus va tushlik uchun yetardi. Besh kunlik ish haqimni hafta oxirida 100 ming so‘m qilib onamga berardim. Maoshimga o‘zim uchun asosiy ish quroli — birinchi kompyuterimni sotib olganman. IT’ning grafik dizayn yo‘nalishiga ilk qadamimni shu yerda qo‘yganman.
“Ishimni rad etmoqchi bo‘lishgan, ammo to‘xtamaganman”
— Ilk ishim bir kompaniyaga logotip yasab berish bo‘lgan. Taxminan 100 ga yaqin variant qilganman, ammo mijoz rad etavergan. Mayli qo‘yavering, qiynalib ham ketdingiz, degan. Ammo men bir ishni boshladimmi, oxirigacha yetkazishga o‘rganganman. Shu tariqa unga o‘zi istaganidek mahsulotni chiqarib berganman va ishimni 100 ming so‘mga sotganman. 2019-yillardagi voqea bu. To‘g‘ri, kamroq, ammo inson o‘zi ishlab chiqargan mahsulotni ko‘chada ko‘rib qolishi juda faxrlanarli. Pul esa qo‘shimcha yoqimli bonus bo‘lgan.
O‘sha vaqtlarda ham ish topish va ishchi kerakligini e’lon qiladigan kanallar bo‘lardi. Kollejni tamomlab, shu kanallarda qila oladigan ishlarim haqida e’lon berganman. Bir kompaniyadan bizda ishlashingiz mumkin deb aloqaga chiqishgan. Ofisda erkaklar ko‘p edi, qizlardan faqat bir o‘zim ishlardim. Bitta bo‘lsa ham qiz bola ishga olaylik, yonimda men bilan ishlasa bo‘ldi, deb so‘rayverardim. Biroq bu maqsadimdan qaytishga sabab bo‘lolmagan, sohaning o‘zi menga yoqqan. Bu kasb aslida qizlar uchun ko‘proq mos-ku, deb ko‘p o‘ylardim. Chunki grafik dizayn sohasi estetika, did, go‘zallik, tartiblash bilan bog‘liq.
“IT aslida qizlarning kasbi!”
— IT’chilar nima qiladi? Bugungi kunda ular asosan web saytlar yaratadi. Ammo saytning maketini, dizaynini kim qilib beradi? Grafik dizaynerlar, albatta. Logotipni ham, prototipni ham dizayner yasaydi. Shu sababli ishimiz IT bilan bog‘liq. Shaxsan men ishimni IT sohasi deb hisoblayman, sababi sun’iy intellekt va boshqa qidiruv tizimlaridan keng foydalanamiz.
Bugungi kunda ko‘plab mahalliy va xorijiy kompaniyalar bilan hamkorlikda ishlayman. Brend dizayn bo‘yicha onlayn kursim bor, ko‘plab o‘quvchilarning ustoziman. Shogirdlarimning ba’zilari hatto mendan ham o‘tadi.
IT sohasi erkak kishidan ham ko‘proq qizlarga mos deb ayta olaman. Ota-onalar, odatda farzandining uzoqroq ishxonaga borishidan xavotir olishi mumkin. Bu soha aynan ota-onaning xavotirini kamaytirishga yordam beradi. Nega? Kompyuter bilan ishlasa IT’da uydan chiqmay ham ishlasa, katta daromadga chiqsa bo‘ladi. Faqat undan avval o‘quv markaz va kurslarga borishga sharoit yaratib berishsa kifoya.
“Mehnatim orqali dadamga Cobalt avtomobilini sovg‘a qilganman”
— Yoshligimdan ota-onamga meni o‘qitishgani evaziga ularni rozi qilish, minnatdorlik bildirish maqsadida uy yoki avtomobil sovg‘a qilish fikri bo‘lardi. O‘zim ishlab topgan pullarim orqali dadamga Cobalt avtomobilini sovg‘a qilmoqchi bo‘lganman. Pulimni bankdan dollar qilib kelganimda har safar quvonardim. Ba’zida 50 dollar, ba’zida 100 dollar qo‘shardim. Vaqti kelsa, 300-400 dollarlab ham yig‘ish qutisiga solib yuborardim. Mashina avtosalondan chiqadigan kuni hamma oila a’zolarim bilan borganmiz, dadam juda xursand bo‘lgan. Onam dadamdan ko‘proq quvongan. Mashina raqami turadigan joyida “Dadajonimga” deb yozdirib, mashinani qizil lentalar bilan bezatganman. Yo‘lda boshqa haydovchilar ham signal chalib, tabriklashgan. Sevgan soham orqali orzularimdan birini amalga oshirganman.
Videoni to‘liq holda quyidagi havola orqali tomosha qilishingiz mumkin.
Izoh (0)