Toshkentda yangi avtobus yo‘nalishi ochildi

Toshkent markazidan Yangi Toshkentga qatnaydigan 197-sonli avtobus yo‘nalishi tashkil qilindi. Bu haqda Toshkent shahar transport va yo‘l-transport infratuzilmasini rivojlantirish bosh boshqarmasi ma’lum qildi.

Xabarga ko‘ra, boshqarma boshlig‘ining tegishli buyrug‘iga asosan 2025-yil 28-martdan ayrim o‘zgarishlar amalga oshiriladi. Xususan, 190-sonli avtobus yo‘nalishi Yangibozor ASHB—Mashinasozlar metrosi yo‘nalishi Yangi O‘zbekiston ko‘chasi orqali Yangi Toshkent bekatigacha bir tomonlama harakat qiladi. Keyin o‘zining avvalgi yo‘nalishi bo‘ylab harakatni davom ettiradi.

Yangi 197-sonli avtobus yo‘nalishi ochiladi. O‘zbekiston mehmonxonasi bekati—Yangi Toshkent bekati yo‘nalishi tashkil etiladi. Ushbu yo‘nalish Maxtumquli va Yangi O‘zbekiston yo‘li ko‘chalari orqali harakatlanadi.

Shuningdek, 137-sonli avtobus yo‘nalishi endilikda Istiqbol mahallasi bekatidan Parkent yo‘li ko‘chasi orqali Yangi Toshkent bekatigacha ikki tomonlama harakat qiladi. Istiqbol mahallasi—Qo‘shqo‘rg‘on mahallasi yo‘nalishi Yangi Toshkent bekati—Qo‘shqo‘rg‘on mahallasi deb nomlanadi.

Toshkentda 10 ta avtobus yo‘nalishi o‘zgartirilgan edi. 

5-martdan boshlab yo‘lovchi oqimi va fuqarolar murojaatlarini inobatga olgan holda ayrim avtobus yo‘nalishlariga o‘zgartirishlar kiritiladi. Xususan:

• 29-sonli “Huvaydo” mahallasi—“Paxtakor” metrosi: Beruniy va Al-Xorazmiy ko‘chalari kesishmasidan chapga burilib harakatlanadi.
• 120-sonli “Chorsu” metrosi—“Guliston” mahallasi: “Chorsu” metrosidan “Guliston” mahallasiga borishda va qaytishda A.Navoiy ko‘chasi orqali harakatlanadi.
• 105-sonli Sergeli qo‘rg‘oni—Chilonzor buyum bozori: Xonabod ko‘chasidan harakatlanadi, Ulgurji bozoriga kirmaydi.
• 117-sonli Toshkent quvur zavodi—Food City: Toshkent quvur zavodidan kelishda Ulgurji bozori orqali harakatlanadi.
• 154-sonli “Bobur” mahallasi—Zangiota yuqumli kasalliklar shifoxonasi: “Bobur” mahallasidan THAY va Yangi Sergeli ko‘chalari orqali harakatlanadi.
• 87-sonli Al-Xorazmiy mavzesi—Qoraqamish 2/4 mavzesi: Guliston, Poygoh, Qurilish, Qovunchi ko‘chalari orqali Chilonzor 30-dahasi bekatigacha harakatlanadi.
• 17T-sonli Bekobod mavzesi—Chilonzor buyum bozori: Chilonzor buyum bozoridan kelishda Beshqayrag‘och, Bekobod, Istirohat ko‘chalari orqali harakatlanadi.
• 99-sonli Suvsoz mavzesi—“Farhod” bozori: Suvsoz mavzesidan kelishda Kichik halqa yo‘li, Lutfiy va Farhod ko‘chalari orqali harakatlanadi.
• 12-sonli “Qo‘yliq” dehqon bozori—Qushbegi mavzesi: Qushbegi mavzesidan Kichik halqa yo‘li va Bobur ko‘chalari orqali Xalqaro aeroport-2 bekatigacha harakatlanadi.
• 174-sonli “Aviasozlar” ASHB—Jumabozor qo‘rg‘oni: “Jumabozor” ASHBdan Jumabozor qo‘rg‘oni bekatigacha uzaytiriladi.