Toshkentda avtobus haydovchisi yo‘lovchilarni tushirib yuborgani aytilgan xabarlar tarqaldi. “Toshshahartransxizmat” holatga izoh berdi.
Ma’lum qilinishicha, ushbu holat 2-Avtobus saroyi filialiga biriktirilgan, Yutong rusumli 72-sonli avtobus haydovchisi Sh.Sh bilan sodir bo‘lgan. Bunda haydovchi avtobusni Aviasozlar avtoshohbekatidan Jomiy maydoni tomonga boshqarib borayotgan vaqtda, “Aviasozlar dehqon bozori” oraliq bekatida avtobusning harorat signali ishlab ketgan.
Haydovchi yo‘lovchilarga sovitish tizimidagi suvning harorati keskin oshishi natijasida avtobusda yuzaga kelgan muammo sababini tushuntirib, yo‘lovchilardan avtobusni tark etib, ortidan kelayotgan avtobusni kutishlarini taklif qilgan.
Shuningdek, haydovchi yo‘l haqini to‘lagan yo‘lovchilar keyingi avtobusda to‘lamasligini va bu haqida keyingi avtobus haydovchisini shaxsan ogohlantirganini ma’lum qilgan.
Shunga qaramay, naqd pulga chek orqali to‘lov qilgan ayrim yo‘lovchilar haydovchidan pulni naqd ko‘rinishida qaytarishini talab qilgan. Haydovchi esa yo‘lovchilarga yana bir bor keyingi avtobusda to‘lov qilmasliklari va keyingi avtobusning haydovchisi ogohlantirilganligi haqida ma’lumot bergan.
Shundan so‘ng haydovchi avtobusni 2-Avtobus saroyi filialiga olib borib, texnik tekshiruvdan o‘tish uchun yo‘llanma olgan holda “Toshavtota’mirxizmat” UKga yetkazgan. Hozirda avtobusning texnik nosozligini bartaraf etish ishlari olib borilayotgan bo‘lib, nosozlik to‘liq bartaraf etilganidan so‘ng avtobus yo‘nalishda xizmat ko‘rsatish uchun chiqarilishi aytildi.
Ma’lumot o‘rnida, jamiyat tarkibiga kiritilgan avtobus saroylari tasarrufidagi avtobuslarning faoliyati doimiy ravishda onlayn kuzatib boriladi. Ularning har bir harakati qat’iy nazoratga olingan. Avtobus faoliyati davomida biron-bir qoidabuzarlikka yo‘l qo‘ygan holatlari aniqlangan taqdirda, haydovchiga nisbatan tegishli choralar ko‘rilayotgani aytildi.
Izoh (0)