Malayziyaning Subang-Jaya shahridagi gaz quvurida sodir bo‘lgan yong‘in oqibatida kamida 145 kishi jabrlangan. Bu haqda Malay Mail gazetasi politsiya ma’lumotlariga asoslanib xabar berdi.

Ta’kidlanishicha, gaz quvurida portlash yuz bergan. Yonma-yon turgan ko‘p qavatli binolardan ham baland olov ustuni osmonga ko‘tarilgan. So‘nggi ma’lumotlarga ko‘ra, 150ga yaqin odam jarohat olgan.

Ma’lumotlarga ko‘ra, 100dan ortiq kishi kuyish va boshqa jarohatlar bilan kasalxonalarga yotqizilgan. Atrofdagi aholi xavfsiz hududlarga ko‘chirilmoqda. 190 dan ortiq uy va 159 ta transport vositalariga zarar yetgan.

Gaz quvuri Petronas davlat energetika kompaniyasiga qarashli. Kompaniya vakillari yaqin atrofdagi yoqilg‘i quyish shoxobchalariga zarar yetmaganini ma’lum qilishgan.
Izoh (0)