O‘zbekiston va Malayziya o‘rtasida tashqi savdo aylanmasi yil boshidan buyon 36 foizga oshdi, deb xabar bermoqda Bojxona qo‘mitasi raisining matbuot kotibi.
Unda aytilishicha, Bojxona qo‘mitasi raisi boshchiligidagi delegatsiya Malayziyaga ishchi tashrifni amalga oshirdi. Kuala Lumpur shahrida tashrifning asosiy voqeligi — Malayziya qirollik bojxona departamenti bosh direktori bilan uchrashuv o‘tkazildi.
5-fevral kuni Shavkat Mirziyoyevning Malayziyaga oliy darajadagi tashrifi doirasida, ikkala davlat o‘rtasida bojxona sohasidagi hamkorlikni mustahkamlashga qaratilgan bitim imzolandi. O‘zbekiston va Malayziya bojxona xizmati tarixida ilk bor yuqori darajada o‘tkazilayotgan mazkur uchrashuv esa bu yo‘nalishdagi amaliy chora-tadbirlarning mantiqiy davomi bo‘ldi.
Ta’kidlanishicha, mamlakatlar o‘rtasidagi savdo munosabatlari kundan kunga mustahkamlanib, o‘zaro aloqalar yanada rivojlanib bormoqda. Yil boshidan buyon O‘zbekiston va Malayziya o‘rtasida tashqi savdo aylanmasi 36 foizga oshib, salkam 20 mln AQSH dollarini tashkil qildi.
O‘zbekistondan Malayziyaga asosan meva-sabzavot, mineral o‘g‘itlar eksport qilingan bo‘lsa, ushbu davlatdan O‘zbekistonga o‘simlik yog‘ilari, qahva, choy va ziravorlar, kimyo sanoati va oziq-ovqat mahsulotlari import qilingan.
Uchrashuvda asosiy e’tibor o‘zaro hamkorlik istiqbollari va yo‘nalishlarini belgilab olish, bojxonani raqamlashtirish va sun’iy intellektni qo‘llash bo‘yicha o‘zaro tajriba almashish, bojxona xodimlari uchun turli o‘quv malaka oshirish kurslarini tashkil qilish masalalariga qaratildi.
Bojxona qo‘mitasi raisi Bojxona instituti bilan Malayziya qirollik bojxona akademiyasi o‘rtasida faol aloqalarni yo‘lga qo‘yish, O‘zbekistonda malayziyalik sayyohlar uchun ziyorat turizmini yanada rivojlantirish, kinologiya sohasida hamkorlikni yo‘lga qo‘yish, kelgusida vakolatli iqtisodiy operatorlarni o‘zaro tan olish kabi takliflarni ilgari surdi.
Uchrashuvda Malayziya bojxona xizmati rahbari O‘zbekistonga taklif qilindi. Tomonlar uchrashuv yakunlari bo‘yicha qator hujjatlarni imzoladi.
Shavkat Mirziyoyev Malayziya bosh vaziri Anvar Ibrohimning taklifiga binoan 4-fevral kuni kechqurun rasmiy tashrif bilan ushbu mamlakatga borgan edi. Prezident aeroportda Malayziya parlamenti spikeri bilan uchrashuv o‘tkazgan. Bo‘lajak oliy darajadagi uchrashuvlar kun tartibi yuzasidan fikr almashilgan.
5-fevral kuni Kuala-Lumpur shahridagi “Perdana Putra” hukumat majmuasida 5-fevral kuni Shavkat Mirziyoyevni rasmiy kutib olish marosimi bo‘lib o‘tgan. Marosimdan so‘ng oliy darajadagi muzokaralar o‘tkazilgan.
Izoh (0)