Ukrainada qulagan Malayziya samolyotining “qora qutilari”dagi ma’lumot layner raketa bilan urib tushirilgani haqidagi axborotni tasdiqlamoqda. Bu haqda, Donetskdagi aviahalokat ishi bo‘yicha surishtiruvga yaqin Yevropadagi manbaga asoslanib, AQShning CBS telekanali xabar bermoqda, deb yozadi “Kun” nashri.
“Raketa o‘z ishini qilgan – u samolyotlarni urib tushirish uchun mo‘ljallangan bo‘lgan”, – deya manbaning so‘zlaridan iqtibos keltirmoqda nashr. Uning so‘zlariga ko‘ra, “qora qutilar”dagi ma’lumot “kuchli portlash natijasida komrpessiya yo‘qolgani”ni tasdiqlamoqda.
Eslatib o‘tamiz, 17-iyul kuni Malaysia Airlines’ning Amsterdamdan Kuala-Lumpurga uchib ketayotgan “Boing-777” layneri Ukrainaning Donetsk viloyatida qulagan edi. Samolyot bortida bo‘lgan 298 kishining barchasi halok bo‘lgan. Ukraina hukumati ushbu voqeada Donetskda harakat qilayotgan rossiyaparast ayirmachilarni ayblab chiqdi, biroq ayirmachilar ularning ixtiyorida bunday balandlikda uchayotgan samolyotlarni urib tushirish imkonini beradigan vositalar yo‘qligini ma’lum qildi.
Hodisa tafsilotlarini o‘rganish bo‘yicha tashkil etilgan xalqaro komissiya tarkibidan turli mamlakatlardan, xususan, Rossiya va Ukrainadan taklif etilgan jami 24 nafar ekspert jalb etilgan bo‘lib, komissiyaga Gollandiya rahbarlik qilmoqda. “Qora qutilar”ni ochish ishlari esa Buyuk Britaniyada amalga oshirilmoqda.
Izoh (0)