“Daryo” nigohida Jalan Alor: rangin chiroqlar, turfa ta’mlar, ajabtovur tungi muhit (fotosayr)

Malayziya poytaxti Kuala Lumpurga tashrif buyurgan har bir sayyoh shaharning tungi hayotini his qilish va haqiqiy ko‘cha taomlaridan bahramand bo‘lish uchun Jalan Alor ko‘chasiga yo‘l olishi shart. Bu ko‘cha kunduzi odatiy ko‘rinishda bo‘lsa-da, kech tushishi bilan butunlay boshqa olamga aylanadi. Yorqin chiroqlar, har xil millatlarga mansub oshpazlarning qizg‘in harakati, tamaddixonalar va ko‘cha sotuvchilarining betakror taomlari havoni turli xil ishtahani ochuvchi hidlar bilan to‘ldiradi.

Jalan Alorda Osiyo oshxonasining eng yorqin ta’mlarini topish mumkin. Malay, xitoy, tailand va hind oshxonalarining o‘ziga xos taomlari shu yerda uyg‘unlashgan. Dengiz mahsulotlari, mashhur satay shashliklari, noodli sho‘rvalar, barbekyu usulida pishirilgan go‘sht va ekzotik mevalar – bularning barchasi sayyohlarni o‘ziga jalb qiladi. Ayniqsa, bu yerga mahalliy aholi ham ko‘p tashrif buyurishi taomlarning sifati va mazali ekanligidan dalolat beradi.

Ko‘chada shovqin tinmaydi – har tomondan savdogarlar mijozlarni jalb qilishga harakat qilsa, sayyohlar va mahalliy odamlar stol atrofida to‘planib, uzoq suhbat quradilar. O‘ziga xos muhit va shahar tungi hayotining jozibasi Jalan Alorni Kuala Lumpurning eng qiziqarli gastronomik manzillaridan biriga aylantiradi. Agar Kuala Lumpurga borsangiz, bu ko‘chada hech bo‘lmaganda bir marta kechki ovqatlanib, shaharning haqiqiy ta’mini his qilishingiz shart. 

Quyidagi “Daryo” fotomuxbiri Madina Nurmanning ushbu ko‘chadan tayyorlagan fotolavhalarini tomosha qilishingiz mumkin.