2025-yilning 25-26-fevral kunlari Pokiston bosh vaziri Shaxboz Sharifning O‘zbekiston Respublikasiga rasmiy tashrifi bo‘lib o‘tdi. Pokistonlik delegatsiyaning tashrifi doirasida Toshkentda o‘tkazilgan O‘zbekiston-Pokiston biznes-forumida O‘zbekiston Respublikasi Prezidenti Sh.M. Mirziyoyev, Pokiston bosh vaziri Shaxboz Sharif hamda ikki mamlakat yetakchi kompaniyalarining 300 ga yaqin vakillari ishtirok etdi.
Biznes-forum davomida Havas Holding vakillari Pokistonning agrosanoat tarmog‘idagi yirik kompaniyalari bilan umumiy qiymati 30 mln dollarlik shartnomalarni tuzishga erishdilar.
Xususan, Sohail Hatoon Corporation kompaniyasi bilan qishloq xo‘jaligi mahsulotlarini yetkazib berish bo‘yicha 20 mln dollarlik eksport-import shartnomasi imzolandi.
Sohail Haroon Corporation (SHC) – Pokiston qishloq xo‘jaligi kompaniyasi bo‘lib, dunyoning turli mamlakatlariga meva va sabzavotlarni ulgurji shaklda sotish va eksport qilish bilan shug‘ullanadi. Ayni paytda kompaniya mahsulotlari AQSh, Malayziya, Singapur, Indoneziya, Tayland, Yaqin Sharq va Yevropa Ittifoqi mamlakatlari bozorlariga yetkazib beriladi.
Sohail Haroon Corporation mahsulotlari Tesco, Aldi, Hyperstar, Carrefour va boshqa yirik xalqaro tarmoqlarda sotiladi.
Havas Holding vakillari Yaqoot & Sons kompaniyasi bilan 10 million AQSh dollari miqdoridagi shartnomani imzoladilar.
Yaqoot & Sons Pokistondagi eng yaxshi guruch navlarini ishlab chiqarish, qayta ishlash va sotishga ixtisoslashgan. Kompaniya Panjobning eng unumdor tumanlaridan birida o‘z ekin maydonlariga ega.
Havas Holding va Yaqoot & Sons o‘rtasidagi hamkorlik O‘zbekiston oziq-ovqat bozorini sifatli va arzon guruch mahsulotlari bilan ta’minlashda yangi istiqbollarga zamin yaratadi.
Havas Holding haqida
Havas Holding – 2018-yilda tadbirkor Fatxulla Sadikov tomonidan asos solingan ko‘p tarmoqli kompaniyalar guruhi. Hozirda guruh korxonalari chakana savdo, development, qishloq xo‘jaligi mahsulotlarini ishlab chiqarish va FMCG-tovarlar distributsiyasi bilan shug‘ullanib keladi. Havas Holding korxonalarida 4000 ga yaqin kishi mehnat qiladi.
Havas Holding xalqaro hamkorlikni izchil rivojlantirib, O‘zbekiston milliy iqtisodiyotining global bozorlarga integratsiyalashuviga hissa qo‘shishda davom etmoqda.
Reklama huquqi asosida.
Izoh (0)