Hind okeanida, Avstraliyaning g‘arbiy qirg‘oqlari yaqinida, 2014-yil mart oyida Kuala Lumpurdan Pekinga yo‘l olgan Malaysia Airlines aviakompaniyasining MH370 reysini bajarayotgan Boeing 777-200 samolyotini qidirish qayta boshlandi. Bu haqda 9News xabar berdi.
Ma’lumotlarga ko‘ra, qidiruv ishlarini Malayziya hukumati bilan tuzilgan shartnoma asosida AQSHning Ocean Infinity kompaniyasi olib bormoqda.
Yangi qidiruv operatsiyasi taxminan 15 ming kvadrat kilometr maydonni qamrab olishi kutilmoqda. U Avstraliyaning g‘arbiy qirg‘og‘idagi Pert shahridan taxminan 1,5 ming kilometr uzoqlikda amalga oshiriladi. Qidiruvlarni kichik hududda olib borish ularni oldingi 200 ming kvadrat kilometrli operatsiyalarga nisbatan aniqroq va puxta o‘tkazish imkonini beradi.
♦ Boeing 777-200 samolyoti 2014-yil 8-mart kuni mahalliy vaqt bilan soat 00:42 da Kuala Lumpurdan Pekinga yo‘l oldi. 40 daqiqadan so‘ng ekipaj so‘nggi marta aloqaga chiqdi, 7 soatdan keyin esa layner radarlardan g‘oyib bo‘ldi. Samolyotning bir nechta kichik parchalari topildi. Yo‘lovchilar va ekipaj a’zolarining jasadlari aniqlanmadi. 239 kishi “baxtsiz hodisa oqibatida” halok bo‘lgan hisoblandi.
Ehtimol, samolyot Hind okeanining janubiy qismida halokatga uchragan. Qidiruv operatsiyasi samolyot halokatga uchragan joyni aniqlay olmagan.
2018-yil iyul oyida Malayziya fuqaro aviatsiyasi departamenti rahbari Azharuddin Rahmon 2014-yilda yo‘qolgan Boeing haqidagi hisobotini taqdim etgach, iste’foga chiqdi. Uning aytishicha, hisobot parvoz amalga oshirilgan Kuala Lumpur aviadispetcherlik xizmati faoliyatidagi qoidabuzarliklarni aniqlagan. Malayziya aviatsiya ma’murlari javobgarlikka tortilmagan bo‘lsa-da, Rahmon o‘z lavozimini tark etishga qaror qildi.
2024-yilning mart oyida Malayziya hukumati g‘oyib bo‘lgan Boeing laynerini qidirishni qayta boshlashga tayyorligini bildirgandi. O‘sha paytda Avstraliya Malayziyaga samolyotni topishda yordam ko‘rsatishga tayyor ekanini ta’kidlagandi.
Izoh (0)