NASA 2 oydan buyon orbitada bo‘lgan astronavtlar qachon qaytishini tez orada e’lon qilmoqchi

NASA tez orada Boeing’ning yangi Starliner kapsulasidagi texnik muammolar tufayli orbitada ikki oydan ortiq qolib ketgan ikki nafar astronavtning qaytish sanasini e’lon qilishini aytdi.

Biroq, NASA astronavtlarni Yerga qaytarishni qanday amalga oshirishni hozircha hal qilmaganini tan olgan. Koinot agentligining davom etayotgan sinov missiyasi haqidagi so‘nggi xabarlarga ko‘ra, rahbarlar yakuniy qarorni shu hafta oxirida yoki keyingi hafta boshida qabul qilishni rejalashtirmoqda.

Astronavtlar 58 yoshli Sunita Uilyams va 61 yoshli Butch Uilmor Xalqaro kosmik stansiyada qariyb 70 kundan beri qolib ketgan. Dastlab rejalashtirilganidek, ular orbitada taxminan sakkiz kun bo‘lishi kerak edi. OAVga ko‘ra, Starliner’ning ba’zi manyovr dvigatellari va geliy sizib chiqishi bilan bog‘liq muammolar kuzatilgan.

Starliner 5-iyun kuni texnik sabablarga ko‘ra ikki marta kechiktirilganidan so‘ng o‘zining birinchi boshqariladigan parvozini amalga oshirgan edi. Uchish nuqtasidan stansiyagacha bo‘lgan parvoz 26 soat davom etgan.