Oq uy NASAga Oy va boshqa samoviy jismlar uchun yagona vaqt standartini yaratish vazifasini topshirdi, chunki AQSH oy poygasi kuchayib borayotgan bir paytda kosmosda xalqaro meʼyorlarni o‘rnatishni maqsad qilgan. Bu haqda Reuters Oq uyning Fan va texnologiya siyosati boshqarmasi (OSTP) hujjatlariga tayanib xabar berdi.
Agentlik taʼkidlaganidek, Oydagi yagona vaqt standarti Oydagi kosmik apparatlar va sunʼiy yo‘ldoshlar uchun vaqt standartiga aylanadi, ular uchun vazifalarni bajarishda o‘ta aniqlik muhim ahamiyatga ega.
Oq uyga ko‘ra, yagona Oy vaqti standartisiz kosmik kemalar o‘rtasida ma’lumotlarni uzatish, shuningdek, Yer, Oy sun’iy yo‘ldoshlari, bazalar va astronavtlar o‘rtasidagi aloqani sinxronlashtirish qiyin bo‘ladi. Vaqtdagi tafovutlar Oyning o‘zida va uning orbitasida kartografiya va geolokatsiya bilan ishlashda xatolarga olib kelishi mumkin.
Yerdagi vaqt Muvofiqlashtirilgan universal vaqt (UTC) asosida tartibga solinadi. Ushbu xalqaro standart Yerning turli qismlarida joylashgan atom soatlarining keng tarmog‘iga tayanadi. Oq uyning Fan va texnologiya siyosati boshqarmasi oy vaqtining yagona standarti uchun atom soatlari Oyga joylashtirilishi kerak, deb hisoblaydi.
Izoh (0)