NASA 21-iyul kuni kamdan kam uchraydigan hodisa — Quyoshda qora plazma otilishini qayd etdi. Bu Yerda elektr taʼminoti uzilishlarga olib kelishi mumkin. Bu haqda Daily Mail xabar berdi.
Mazkur hodisa “sovuq” quyosh chaqnashi deb ham ataladi. Plazma harorati Farengeyt bo‘yicha 36 ming gradus atrofida bo‘ladi. Taqqoslash uchun, olimlar tomonidan yaxshiroq o‘rganilgan “issiq” quyosh chaqnashlarining harorati 144 000 Farengeyt darajasiga yetadi.
Sovuq chaqnashlar ancha past temperaturaga ega bo‘lishiga qaramasdan, ular mikroto‘lqinli nurlanish nuqtayi nazaridan unchalik intensiv emas. NASA tomonidan Quyosh dinamikasi observatoriyasidan olingan videoda “sovuq” quyosh chaqnashining qora buluti Quyoshdan otilib chiqayotgani ko‘rinadi. Bu hodisa so‘nggi o‘n yilliklardagina astrofiziklar tomonidan jiddiy o‘rganila boshlandi.
Okean va atmosfera tadqiqotlari milliy boshqarmasi (NOAA) qora plazma impulsi “elektr tarmog‘idagi tebranishlar”ga olib kelishi mumkinligi haqida ogohlantirgan. Bu keyingi 24 soat ichida o‘rtacha darajadagi yoki M sinfidagi yangi quyosh chaqnashlari 60 foizlik ehtimol bilan, X sinfidagi ekstremal chaqnashlar esa 15 foizlik ehtimol bilan amalga oshishini bildiradi. X sinfidagi chaqnashlar eng kuchlisi bo‘lib, butun dunyo bo‘ylab radioaloqaning uzilishiga olib kelishi mumkin.
- Quyosh chaqnashlari rentgen nurlanishining kuchiga qarab beshta sinfga bo‘linadi: A, B, C, M va X. Bunda minimal sinf A0.0 bo‘lib, Yer orbitasida kvadrat metrga 10 nanovatt radiatsiya quvvatiga to‘g‘ri keladi. Keyingi harfga o‘tishda quvvat 10 barobar ortadi. Quyoshdagi chaqnashlar odatda Yer tomon yo‘nalgani uchun magnit bo‘ronlarini keltirib chiqarishi mumkin.
Izoh (0)