14-fevral kuni “O‘zbekkosmos” agentligi tashabbusi bilan O‘rta Chirchiq tumanidagi “Yangi hayot” aerodromida kosmik texnologiyalar va muhandislikka ishtiyoqi baland 250 nafar o‘quvchi va talabalar o‘zlari yasagan mini sun’iy yo‘ldoshlarning sinov parvozini amalga oshirdi.
Sun’iy yo‘ldosh nusxalari 1000-1500 metr balandlikka dronlar yordamida uchiriladi hamda havo harorati, balandlik va bosim nazorati kabi ma’lumotlarni qayd etadi.
— CanSat yasash uchun ikki oy vaqt sarflandi. Bizning CanSat bosim, harorat, joylashuv va boshqa parametrlarni qayd etadi va suratga oladi. Suratlarni o‘zi bilan fleshkada olib tushadi. Bu 1000 metrdan ortiq balandlikka uchirilgan ilk parvoz. Avval universitet binosida turli balandliklarda sinab ko‘rganmiz. Keyingi bosqichlarda CanSatni raketa yordamida parvozini amalga oshirmoqchimiz, deydi mini sun’iy yo‘ldoshi muvaffaqiyatli parvozni amalga oshirgan ishtirokchi, Toshkent axborot texnologiyalari talabasi Zuhriddin Hamidjonov.
Ma’lumot uchun, CanSat bu kichik konserva idishi hajmidagi mini sun’iy yo‘ldosh bo‘lib, ilk bor bu loyiha 1990-yili AQSHda NASA va Amerika universitetlari hamkorligida tashkil etilib, yoshlarning kosmik missiyalarda ishtirok etish ko‘nikmasini oshirishga qaratilgan. Bugunga kelib esa CanSat uchirish musobaqalari Rossiya, Xitoy, Angliya, Fransiya, AQSH, Yaponiya, Hindiston, Turkiya, Ozarbayjon kabi ko‘plab davlatlarda muntazam o‘tkazilmoqda.
— Bugun O‘zbekiston Milliy universiteti, Toshkent axborot texnologiyalari universiteti, Toshkent irrigatsiya va qishloq xo‘jaligini mexanizatsiyalash muhandislari instituti, Yangi O‘zbekiston universiteti, Toshkent davlat transport universiteti hamda “Sehriyo” maktabidan 250 talaba va o‘quvchi to‘plangan. Ular o‘zi yasagan kichik tipdagi sun’iy yo‘ldoshlarning uchishini sinov tariqasida amalga oshiradi.
Bu loyiha ilk bor o‘tkazilganda ikkita guruh qatnashgandi, hozirda guruhlar soni 13 taga yetdi — bir guruhda 13 ta ishtirokchi bo‘ladi. Avval sun’iy yo‘ldosh nusxalari 500 metr balandlikka uchirilgan bo‘lsa, bugunga kelib ular 1 km ga ko‘tariladi. Ilk parvozda mini sun’iy yo‘ldoshlar signal va balandlikni tekshirgandi, endi esa bosim, harorat va radiatsiyani tekshiribgina qolmay, suratga olish jarayonini ham amalga oshiradi.
CanSat dasturining final bosqichi shu yilning aprel oyida Butunjahon aviatsiya va kosmonavtika kuni doirasida keng miqyosida o‘tkaziladi. G‘oliblar bilan har yili yoz oylarida o‘tkaziladigan Butunjahon CanSat loyihasi uchun tayyorgarlik jarayonlarini boshlaymiz. Avval respublika bo‘ylab o‘tkazib, so‘ng g‘olib guruh bilan 2026-2027-yillarda xalqaro musobaqaga yo‘l olamiz”, deydi “O‘zbekkosmos” agentligi bo‘lim boshlig‘i Humoyun Rahmonov.
Ochiq uchish zonasida maktab o‘quvchilari tomonidan tayyorlangan pnevma-gidro raketalarni uchirish bo‘yicha ham tanlov o‘tkazildi. Tadbir so‘ngida har bir guruh uchun maxsus sertifikatlar topshirildi.
Izoh (0)