NASA “Apollon” missiyasidan 50 yildan ko‘proq vaqt o‘tib Oyga astronavtlarni yuborishda yangi kechikishlar haqida e’lon qildi.
NASA rahbari Bill Nelsonning ma’lum qilishicha, “Artemida” dasturi doirasidagi keyingi missiya, ya’ni to‘rt nafar astronavtning Oy atrofida aylanib chiqishi va ularning Yerga qaytishi 2025-yil sentyabrdan 2026-yil aprelga ko‘chirildi.
Rasmiy shaxslarga ko‘ra, ikki yil oldin amalga oshirilgan birinchi sinovli parvoz chog‘ida tushish apparatining issiqlikdan himoya qiluvchi qobig‘ida yuzaga kelgan shikastlanishlarni o‘rganish ancha vaqt talab etgan. Bundan tashqari, kosmik kemani boshqa jihatlardan ham takomillashtirish zarur bo‘lgan.
Natijada “Artemida”ning uchinchi missiyasi, yana ikki kosmonavtning Oyga qo‘nishi kamida 2027-yilgacha qoldirildi. NASA uni 2026-yilda amalga oshirishni rejalashtirgan.
“Artemida” bu — NASA tomonidan 1960-yillarning oxiri va 1970-yillarning boshlarida amalga oshirilgan “Apollon” oy dasturining davomi. “Artemida” doirasida hozirgacha faqat bitta missiya yakunlangan: 2022-yilda “Orion” nomli uchuvchisiz apparati Oyni aylanib chiqqan.
Oyga uchirish va uning atrofini aylanib chiqish muvaffaqiyatli amalga oshirilgan bo‘lsa-da, apparat atmosferaga kirishda shikastlangan va issiqlik himoya ekrani shikastlangan. Yaqindagina muhandislar buning sababini aniqlashga va harakatlar rejasini ishlab chiqishga muvaffaq bo‘lishdi.
Nelsonning so‘zlariga ko‘ra, to‘rtta astronavt bilan navbatdagi parvoz uchun xuddi shu ekranga ega bo‘lgan Orion qo‘nish apparati ishlatiladi, ammo bunda atmosferaga kirish trayektoriyasi o‘zgartiriladi. Rasmiylarning so‘zlariga ko‘ra, issiqlikdan himoyalovchi ekranni almashtirish kamida bir yilga kechikadi, bu esa Oyga qo‘nishni yanada keyinga suradi.
“Apollon” dasturida 24 nafar astronavt ishtirok etgan, ulardan 12 nafari Oy yuzasiga qadam qo‘ygan. Oxirgi marta bu 1972-yil dekabr oyida “Apollon-17” missiyasi paytida sodir bo‘lgan.
Izoh (0)