Amerikaning SpaceX kompaniyasi 3-martda sinovdan o‘tkazilgan Starship kosmik kemasi bilan aloqa yo‘qolganini ma’lum qildi. Bu haqda Deutsche Welle xabar berdi.
Raketa o‘zining dastlabki ikki sinovidan ancha uzoqroqqa uchishga muvaffaq bo‘lgan. AQSH Milliy aeronavtika va fazoni tadqiq qilish boshqarmasi (NASA) rahbari Bill Nelson SpaceX kompaniyasini tabriklab, sinov parvozini muvaffaqiyatli deb atagan.
Qayta foydalanish mumkin bo‘lgan Starship tizimi 70 metrli Super Heavy va qo‘shimcha dvigatellarga ega 50 metrlik Starship kosmik kemasidan iborat. AQSH janubidagi Starbase xususiy kosmodromidan 73 kilometr balandlikda uchirilgan Starship bosqichlari muvaffaqiyatli ajralib chiqqan.
SpaceX maʼlumotlariga ko‘ra, raketa 200 kmdan ortiq balandlikka ko‘tarila olgan. Sinov parvozi yakunida Starship Hind okeaniga tushishi taxmin qilingan edi, biroq Yer atmosferasiga kirgandan so‘ng qurilma bilan aloqa uzilib qolgan.
SpaceX parvozni muvaffaqiyatli deb atagan, chunki Starship birinchi marta bir nechta tizimlarni sinab ko‘rishga muvaffaq bo‘lgan. Ushbu parvoz davomida SpaceX ilk marta 18 ming plitkadan iborat raketa issiqlik qalqonini sinovdan o‘tkazgan.
2023-yilning aprel va noyabr oylarida Starshipni ishga tushirish bo‘yicha ikkita urinish muvaffaqiyatsiz yakunlangan edi. Birinchi sinov paytida raketa parvozdan 3 daqiqa o‘tgach, bosqichlar ajralmaganidan keyin portlagan. Ikkinchi parvozda esa bosqichlar ajralib chiqishga muvaffaq bo‘lgan, ammo qisqa vaqtdan keyin portlagan.
Starship insoniyat tarixidagi eng katta va eng kuchli raketadir. SpaceX kompaniyasining o‘zi xabar berganidek, kema odamlar va yuklarni Yer orbitasiga, Oy va Marsga yetkaza oladi. Tizimning umumiy loyihaviy yuk ko‘tarish quvvati 150 tonnani tashkil qiladi.
Izoh (0)