Amerika Qo‘shma Shtatlari mart oyi boshida koinotning paydo bo‘lish jarayonini o‘rganishga mo‘ljallangan SPHEREx kosmik observatoriyasini orbitaga chiqarishni rejalashtirmoqda, deb xabar berdi NASA.
Kosmik kema Katta portlashdan keyin bir soniya ichida koinot trillion marta kattalashib, ulkan va kengayib borayotgan koinotga aylangandan so‘ng inflyatsiya deb ataladigan holatni o‘rganishga qaratilgan ma’lumotlarni to‘playdi.
SPHEREx optik va infraqizil nurda ma’lumotlarni to'plash orqali koinot xaritasini tuzadi. Teleskop Yerdan kuzatish qiyin bo‘lgan infraqizil nurni aniqlay oladi. Spektrofotometr butun osmonni 102 ta infraqizil diapazonda xaritalash va milliardlab samoviy jismlar haqida ma’lumot to‘plash uchun ishlatiladi.
SPHEREx missiyasi 2,5 yil davom etadi va shu vaqt ichida qurilma koinotning birinchi infraqizil 3D xaritasini yaratadi.
Og‘irligi yarim tonnaga yaqin bo‘lgan sun’iy yo‘ldoshning narxi 488 million dollarga baholanmoqda, SpaceX Falcon 9 raketasi SPHERExni uchirish uchun ishlatiladi. Qurilma AQSh kosmik kuchlarining Kaliforniyadagi Vandenberg havo bazasidan uchiriladi.
Falcon 9 raketasi quyosh toji va quyosh shamolini o‘rganish uchun PUNCH loyihasi doirasida yaratilgan to‘rtta Amerika sun’iy yo‘ldoshini ham orbitaga chiqaradi.
Izoh (0)