“Kalmar o‘yini”ning ikkinchi mavsumi allaqachon turli reytinglarni zabt etib, tomoshabinlar olqishiga sazovor bo‘ldi. Biroq har qanday sikvel kabi u ham tanqidlardan qochib qutulmadi. Ammo mavsumning qanday yaratilganini bilganingizdan so‘ng, u haqidagi fikringiz o‘zgaradi.
Hammasiga olti oy, yoki Xvan Don Xek qanday mo‘jiza yaratdi?
Tasavvur qiling: butun dunyoni zabt etgan serialning davomini o‘ylab topish, yozish va suratga olishga tayyorlanish uchun atigi olti oy vaqtingiz bor. “Kalmar o‘yini” rejissyori va ssenariy muallifi Xvan Don Xek aynan shunday vaziyatga duch keldi.
Birinchi mavsumning muvaffaqiyati bir vaqtning o‘zida ham omad, ham sinov bo‘ldi. Netflix qat’iy muddat belgiladi, Xvan esa boshqa mualliflarni jalb etishdan voz kechib, barcha epizodlarni o‘zi yozishga ahd qildi. U hatto birinchi mavsumni mashhur qilgan o‘sha atmosferani saqlash uchun ikkinchi mavsumga ham o‘zi rejissyorlik qildi. Aytgancha, bu kabi ko‘lamdagi shou uchun bunday holat juda kamdan-kam uchraydi.
Pinhoniy yovuzlar
Sirli o‘yinga taklif qiluvchi rolini ijro etgan Kon Yu “Kalmar o‘yini”ga qadar hech qachon salbiy qahramonlarni o‘ynamaganini bilarmidingiz? Aktyor 20 yillik faoliyati davomida bunday obrazlardan o‘zini olib qochgan. Uning sovuqqonligi va nazokatli uslubi har bir sahnaga alohida taranglik baxsh etadi.
Bundan tashqari, Frontmen rolini o‘ynagan aktyor Li Ben Xon suratga olish uchun chap qo‘lidan foydalanishni o‘rganishi kerak edi. Lining o‘zi o‘ngaqay, chapaqaylik u uchun haqiqiy sinov bo‘ldi. Shunday ekan, agar Frontmanning g‘ayritabiiy harakatlanayotganini ko‘rsangiz, bilingki, bu xato emas, balki qahramon xarakterining bir qismi.
Mini-o‘yinlar: har soniyadagi bosim
Ikkinchi mavsum o‘yinlarning xilma-xilligi bilan hayratda qoldiradi. Ulardan birida aktyor Kan Xa Nilga gongi o‘ynashni o‘rganishga to‘g‘ri keldi. Mashg‘ulot soatlariga qaramay, final sahnasi baribir professional ishtirokni talab qildi.
Ttakchi o‘ynagan Cho Yuri esa yanada ko‘proq qiyinchilikni boshdan kechirdi. Uning qahramonini uloqtirish sahnasi ekranda mukammal ko‘rinadi, lekin uning ortida o‘nlab muvaffaqiyatsiz dubllar bo‘lgan. Natijada ijodkorlar kadr ishonarli chiqishi uchun kompyuter grafikasidan foydalanishdi.
Ikkinchi mavsum — bu faqat boshlanishi
Ssenariy muallifi dastlab ikkinchi mavsumni hikoyaning birinchi yarmi sifatida o‘ylagan. Mavsum finali javoblardan ko‘ra ko‘proq savollar qoldiradi, ammo bu kelajakdagi seriyalarga qiziqishni kuchaytiradi. Xvan Don Xekning o‘zi tomoshabinlar haqiqiy yakunni faqat uchinchi mavsumda ko‘rishini ta’kidlaydi.
Aynan shuning uchun ham filmning tugashini kutgan xeyterlar o‘zlarini aldangan deb his qilishadi. Ammo agar ikkinchi mavsumga ulkan jumboqning bir qismi sifatida qarasangiz, hammasi tushunarli: bu yerda hamma narsa rejaga muvofiq ketmoqda.
Kutilmalar va reallik
“Kalmar o‘yini”ning ikkinchi mavsumi ko‘plab bahslarga sabab bo‘lmoqda. Serialning kuchi ham shunda: u har qanday tomoshabinni o‘ylashga, bahslashishga va qahramonlar bilan birga yashashga majbur qiladi.
Izoh (0)