Netflix striming tizimi “Kalmar o‘yini” seriali ikkinchi qismining sahna orti lavhalari hamda loyihaga kiritilmagan bir nechta kadrlarni muxlislar bilan bo‘lishdi.
YouTube platformasiga joylashtirilgan 20 daqiqalik videoda reper Tanos (Chxve Son Hyon) ishtirokidagi qiziq lavhalar hamda ishtirokchilar o‘rtasidagi qonli jangning kengaytirilgan versiyasi ham o‘rin olgan.
Serialda Chxve Tanos taxallusi ostidagi antagonist yorqin binafsharang soch, bo‘yalgan tirnoqlar va g‘alati xatti-harakatlarga ega giyohvand reper rolini ijro etgan. Qahramon o‘zining g‘ayrioddiy va qiziqarli obrazi tufayli 2-faslda muxlislarning sevimli ishtirokchilaridan biriga aylandi, ammo unga kam ekran vaqti berildi.
Biroq Netflix’ning kengaytirilgan videosida (09:40) serial epizodiga kiritilmagan sahnalar ko‘p, unda Tanos har bir o‘yinda o‘z jamoasini maqtaydi va hatto hujumga uchraganidan keyin ishtirokchilardan birini himoya qiladi. Serialda bu qismlar kesib tashlangan, chunki rejissyor fikriga ko‘ra, bunday xatti-harakat uning obraziga xos bo‘lmagan.
Qonli jang sahnasining qisqartirilishi ham ajablanarli emas, chunki ijodkorlar tomoshabinning asosiy e’tiborini boshqa bir qancha muhim jihatlarga qaratishni maqsad qilgan. Masalan, musobaqani birinchi bo‘lib boshlab, muvaffaqiyatsizlikka uchragan jamoa va ularning taqdiri atrofdagilarni qo‘rqitishi; o‘yinlarni to‘liq bajargan jamoa hamda Son Gi Xunning taqdiri diqqat markazida bo‘lishi lozim edi.
Mazkur videoda serialdagi sahna orti lavhalardan tashqari dekoratsiyaga bog‘liq ma’lumotlar, kulgili holatlar, shuningdek, Pak Sonxun (transgender o‘yinchi)ning tasodifan ayolga haqiqiy shapaloq tushirgani kabi qiziqarli voqealarning guvohi bo‘lish mumkin.
“Kalmar o‘yini 2” serialining ikkinchi mavsumi o‘tgan yilning oxirida Netflix tomonidan namoyish etildi va tom ma’noda kino sanoatida katta shov-shuvga sabab bo‘ldi. Serial qisqa vaqt ichida barcha raqiblarini ortda qoldirdi, tomoshabinlar soni esa hanuz ortib bormoqda. Serialning uchinchi mavsumi 2025-yil 27-iyunda premyera qilinishi kutilmoqda.
Izoh (0)