Hozirda mashhur koreys aktyorlarini butun dunyo taniydi. Biroq haqiqiy yulduzlar o‘ynaganiga qaramay, katta shuhrat qozonmagan qiziqarli doramalar ham anchagina.
“Samoga yo‘l” (2021)
Beva qolgan Xan Jon U va uning Asperger sindromiga chalingan o‘g‘li Gi Ru “Samoga yo‘l” nomli marhumlarning uylarini tozalash bo‘yicha oilaviy biznesga ega. Ular doimo mijozlar xotirasiga hurmat bilan yondashib, eng muhim buyumlarni ularning qarindoshlariga topshiradilar. To‘satdan Jon U yurak yetishmovchiligidan vafot etadi va Gi Runing vaqtinchalik vasiysi bo‘lib otasining ukasi — yaqinda qamoqdan chiqqan Cho San Gu tayinlanadi. U jang san’ati ustasi, endi akasining vasiyatiga ko‘ra, u Gi Ru bilan birga yashashi va ishlashi kerak.
“Tila tilagingni” (2022)
Yun Kyore shafqatsizlikka to‘la hayotdan charchagan yolg‘iz inson. Bir kuni u bedavo xastalar davolanuvchi shifoxonaga jamoat ishlari uchun boradi. U yerda o‘lim to‘shagidagi bemorlarning so‘nggi istaklarini bajo keltiruvchi guruh rahbari Kan Te Shik va bemorlariga qo‘lidan kelgancha yordam berishga harakat qilayotgan g‘ayratli va mehribon hamshira So Yon Ju bilan tanishadi. Bu uchrashuv Yun Kyorening hayotida burilish nuqtasi bo‘ladi.
“Shoumen” (2016)
Shin Sok Ho musiqa guruhini mashhur qilishga erishgan menejer. U yanada ko‘proq narsaga intiladi, shu sababli o‘z musiqiy studiyasini ochishni rejalashtiradi, ammo uning harakatlari muvaffaqiyatsizlikka uchraydi. Sanoatga qaytish maqsadida u ota-onasining fojiali halok bo‘lishidan so‘ng qo‘shiqchi bo‘lish orzusidan voz kechgan Ha Nil bilan tanishadi. Ha Nilning singlisi Gyo Rin Sok Hoga ishonmaydi va akasini himoya qilish uchun o‘qishdan akademik ta’til olib, uning menejeriga aylanadi. Ular birgalikda muvaffaqiyatga erishish yo‘lida mashaqqatli mehnat va ko‘plab qiyinchiliklarni yengishlari kerak bo‘ladi.
“Kazino” (2022)
Cha Mu Sik kazino boshqarardi, biroq Milliy soliq xizmatining ta’qiblari tufayli Filippinga qochishga majbur bo‘ladi. U to‘laqonli kazino biznesini yo‘lga qo‘yish uchun Filippindagi siyosiy hamda ishbilarmon doiralarni o‘z ta’siriga olish strategiyasini ishlab chiqadi. Ammo kutilmaganda uni tuzoqqa tushiradilar va izidan koreys detektivi O Sun Hun tushadi.
“O‘lim madhiyasi” (2018)
Kim U Jin ismli iste’dodli teatr ssenariy yozuvchisining ajoyib ishi va sevimli oilasi bor. Erkak avvallari turmush o‘rtog‘iga xiyonat qilishni hatto xayoliga ham keltirmagan bo‘lsa-da, qo‘shiqchi Yun Shim Dokka oshiq bo‘lib qoladi. Ularning o‘zaro muhabbati ikkalasi uchun ham haqiqiy fojiaga aylanadi, lekin shu bilan birga “O‘lim madhiyasi” deb nomlangan mashhur koreys qo‘shiqlaridan birining yaratilishiga sabab bo‘ladi.
“Oq Rojdestvo” (2011)
Xususiy maktabning sakkiz o‘quvchisi o‘limni bashorat qiluvchi anonim xat olgandan so‘ng qishki ta’tilda qolishga majbur bo‘ladi. O‘qituvchilardan biri ham ular bilan qolishga qaror qiladi. Birinchi kechada qor bo‘roni tufayli yo‘lda qolib ketgan psixolog Kim Yo Xan ularga qo‘shiladi. Rojdestvo arafasida o‘quvchilar xatlar hazil emasligini, aksincha qotil haqiqatan ham yaqin atrofda ekanligini anglab yetishadi.
Izoh (0)