Futbol bo‘yicha Jahon chempionati saralashining 3-bosqichi 7-turidan o‘rin olgan uchrashuv bugun, 20-mart kuni bo‘lib o‘tdi.
“Bunyodkor” stadionidagi uchrashuvda O‘zbekiston va Qirg‘iziston milliy jamoalari to‘qnash keldi.
Uchrashuvning birinchi bo‘limi sokinroq boshlangan bo‘lsa-da, 20 daqiqa o‘tgach o‘zbekistonliklar faollikni oshirdi. Bu esa 24-daqiqaga kelib samara berdi.
Shomurodovning uzatmasidan so‘ng Alijonov oldinga qarab o‘tayotganda unga nisbatan qo‘pollik ishlatildi. Natijada qirg‘izistonlik himoyachiga qizil kartochka ko‘rsatildi va penalti belgilandi. Biroq ushbu penaltidan Eldor Shomurodov foydalana olmadi.
Shundan so‘ng ham O‘zbekiston MTJ qator imkoniyatlarga ega bo‘ldi. 40-daqiqaga kelib tashkil etilgan hujumlar samarasini berdi. Abbosbek Fayzullayevning uzatmasidan so‘ng Hojiakbar Alijonov to‘pni darvozaga joylab qo‘ydi.
Ikkinchi bo‘lim avvalida qirg‘izistonliklar faollik ko‘rsatgan bo‘lsa-da, o‘zbekistonliklar tezda vaziyatni o‘z qo‘llariga oldi. Yaratilgan qator xavfli vaziyatlar natija bermadi.
Eldor Shomurodov tomonidan urilgan gol ham o‘yindan tashqari holatda deb topildi.
Shunday qilib, O‘zbekiston MTJ navbatdagi g‘alabasini qo‘lga kiritdi va 16 ochko bilan guruhdagi 2-o‘rinni mustahkamlab oldi.
JCH—2026 saralashi
20-mart, juma
O‘zbekiston — Qirg‘iziston 1:0
Gol: 1:0 — 40, Hojiakbar Alijonov
Foydalanilmagan penalti: Eldor Shomurodov, 25.
O‘zbekiston: 1.O‘tkir Yusupov, 2.Abduqodir Husanov, 3.Hojiakbar Alijonov (19.Zafarmurod Abdurahmatov, 88), 4.Farrux Sayfiyev (23.Ibrohimhalil Yo‘ldoshev, 57), 5.Rustam Ashurmatov, 7.Otabek Shukurov (11.Ruslanbek Jiyanov, 78), 9.Odiljon Hamrobekov, 10.Jaloliddin Masharipov (6.Akmal Mozgovoy, 88), 14.Eldor Shomurodov, 18.Abdulla Abdullayev, 22.Abbosbek Fayzullayev
Qirg‘iziston: 1.Erjan Tokotayev, 2.Valeriy Kichin (s), 3.Tamirlan Kozubayev, 4.Said Datsiyev, 7.Joel Kojo (18.Qayrat Jirgalbek Uulu, 57), 8.Eldiar Zaripbekov, 12.Odil Abdurahmonov, 14.Aleksandr Mishchenko, 20.Adilet Kanibekov (6.Kristian Brauzman, 46), 21.Kay Merk (5.Arslan Bekberdinov, 79), 23.Erbol Atabayev (10.Guljigit Aliqulov, 46).
Chetlatish: Said Datsiyev, 24 (Q).
Izoh (0)