Yevropa ittifoqi (YI) mamlakatlaridan birida Yo‘l harakati qoidalarini qo‘pol ravishda buzgan haydovchilar butun ittifoq hududida haydovchilik huquqidan mahrum bo‘lishlari mumkin.
25-mart kuni Yevroparlament va Yevropa ittifoqi mamlakatlari vakillari yo‘l harakati qoidalarini jiddiy buzganlik uchun javobgarlik haydovchilik guvohnomasi berilgan mamlakatdan qat’iy nazar, butun Yevropa ittifoqiga taalluqli bo‘lishi to‘g‘risida kelishuvga erishdi.
Amaldagi qoidalarga ko‘ra, haydovchi yo‘l harakati qoidalarini buzganligi uchun guvohnomasidan mahrum qilish jazosi faqat qoidabuzarlik sodir etilgan mamlakatda qo‘llaniladi. Yevropa ittifoqining qolgan mamlakatlarida, shu jumladan guvohnoma berilgan mamlakatda haydovchilik taqiqi amal qilmaydi.
Yangi kelishuvga ko‘ra, qoidabuzarlik va jazo to‘g‘risidagi ma’lumotlar haydovchilik guvohnomasini bergan davlatga yuboriladi. Aynan u jazoning ijrosini va uning butun Yevropa ittifoqi hududida amal qilishini ta’minlashi kerak.
Yangi qoidalar Yevropa ittifoqi mamlakatlarini quyidagi qo‘pol qoidabuzarliklar uchun haydovchilik guvohnomasidan mahrum qilish to‘g‘risida darhol xabar berishga majbur qiladi:
Mast holda yoki giyohvand modda ta’sirida haydash;
Tezlikni 50 km/soatdan oshirish;
O‘lim bilan tugagan YTH.
Haydovchilar 20 ish kuni ichida sanksiyalar haqida xabardor qilinadi va ular ustidan shikoyat qilishlari mumkin.
Yangi qoidalar kuchga kirganidan besh yil o‘tgach, Yevrokomissiya jazo butun Yevropa ittifoqiga tatbiq etiladigan qoidabuzarliklar ro‘yxatini kengaytirish zarurligini baholaydi. Shuningdek, yangi tartib yanada samaraliroq ishlashi uchun qoidabuzarliklar haqida xabar berishning qat’iyroq muddatlarini joriy etish rejalashtirilgan.
Izoh (0)