Xitoyning IT-giganti Huawei mahalliy avtomobil blogerini hashamatli Maextro S800 sedanini tanqid qilgani uchun sudga berdi. Kompaniya 140 ming dollarga teng mablag‘ so‘radi, deb xabar berdi CarNewsChina.
Huawei S800 ni Mercedes Maybach S680 bilan taqqoslagan bir qator reklama videolarini chiqardi. Ulardan birida kompaniya shisha plastina, qum va suv bilan asfaltdagi chuqurliklardan o‘tishda ikki modelning osma tizimi ishlashidagi farqni namoyish etgan. Barcha holatlarda Xitoy sedanining g‘ildiraklari, nemislarnikidan farqli o‘laroq, oynani sindirmagan, shuningdek, qum va suvga tegmagan. Shunday yo‘l bilan Huawei S800 qulayligini e’lon qilishga intilgan.
Xitoyning Weibo ijtimoiy tarmog‘ida Racing Frappuccino taxallusli avtobloger ushbu videorolik S800 modelining ustunligini namoyish etish uchun maxsus hisoblab chiqilganini ta’kidlagan videoni joylashtirgan.
Go‘yoki videoni tayyorlash uchun Xitoy sedanining jihozlangan massasi bo‘yicha harakat tezligi maxsus hisoblab chiqilgan va suv idishining kerakli chuqurligi tanlangan.
Bloger Huawei ustidan 340 ming dollarlik qarshi da’vo arizasi berishini aytdi.
Maextro S800 — Huawei va JAC tomonidan ishlab chiqilgan 5480 mm uzunlikdagi hashamatli sedan hisoblanadi. Avtomobil ham sof elektr, ham kuch qurilmasining gibrid variantlarida ishlaydi. Modelning XXRda sotuvi joriy yilda boshlanishi kerak.
Izoh (0)