Toshkent shahrida yo‘llarni ta’mirlash ishlariga 12 mlrd so‘m ajratiladi

Toshkent shahrida yo‘lllarni ta’mirlash ishlari bilan bog‘liq xarajatlarni amalga oshirish uchun 12 milliard so‘m ajratiladi. Bu haqda poytaxt hokimining 14-martdagi “Toshkent shahrida yo‘llarni ta’mirlash ishlari bilan bog‘liq xarajatlarni amalga oshirish to‘g‘risida”gi qarorida belgilandi.

Hujjatga ko‘ra, ushbu mablag‘ Toshkent shahar hokimligi huzuridagi Toshkent shahrini rivojlantirsh jamg‘armasi mablag‘lari hisobidan tumanlar Obodonlashtirish boshqarmalariga ajratiladi. Har bitta tumanga 1 milliard so‘mdan taqsimlanadi.

Poytaxt hokimining birinchi o‘rinbosari Baxtiyor Rahmonovga tumanlar hokimliklari hamda tuman Obodonlashtirish boshqarmalari bilan birgalikda ajaratilgan mablag‘larni o‘rnatilgan tartibda maqsadli sarflanishini ta’minlash topshirildi.

Ajratilgan mablag‘larning sarflanishi va bajarilgan ish hajmi bo‘yicha xalq deputatlari Toshkent shahar kengashi va Toshkent shahar hokimligiga hisobot kiritib boradi. Davlat moliyaviy nazorati inspeksiyasi Toshkent shahar boshqarmasi ajratilgan mablag‘larni maqsadli sarflanishi ustidan nazorat o‘rnatadi.

Toshkent shahrida 7-martdan ko‘cha-yo‘l tarmog‘ini ta’mirlash va rekonstruksiya qilish bo‘yicha ishlar boshlangandi. Ta’mirlash ishlari boshlanishidan avval yo‘l harakati xavfsizligini ta’minlash hamda shahar aholisi va jamoat transportining harakatlanishi uchun qulayliklarni oshirish maqsadida poytaxtning transport oqimi faol bo‘lgan ko‘chalari holati tekshirilgan.

Tahlil natijalariga ko‘ra, 2025-yilda joriy va kapital ta’mirlash talab qilinadigan ko‘chalar ro‘yxatini o‘z ichiga olgan manzilli ta’mirlash dasturi ishlab chiqildi. Dastur doirasida umumiy maydoni 65 ming kvadrat metrdan ortiq bo‘lgan yo‘llarni ta’mirlash rejalashtirilgan.

2025-yil yanvarida Toshkentning Yashnobod tumanida Kichik halqa avtomobil yo‘lining Maxtumquli ko‘chasiga tutashgan qismini qayta qurish ishlari nihoyasiga yetkazilgandi. Ishlar doirasida 5700 metr kvadrat yo‘l qoplamasi yotqizildi. Shuningdek, 800 metr suv chiqarish lotoklari o‘rnatildi. Shu bilan birga, 1825 metrga bordyur toshi qo‘yildi.