“Kichkina tabib” filmidagi Doniyor roli bilan tomoshabinlar mehrini qozongan aktyor Dilshodbek Kattabekov 27-fevral kuni 35 yoshni qarshi oldi. Ushbu sana munosabati bilan ijodkorning hayot yo‘liga nazar tashlaymiz.
“Kichkina tabib”ning muvaffaqiyati
Bolaligidan qo‘shiqchi bo‘lishni niyat qilgan Dilshodbek Kattabekov kutilmaganda aktyorlik sohasiga qadam qo‘ygan. Besh yoshidan boshlab davlat tadbirlarida ishtirok etish uchun Sirdaryodan Toshkentga kelgan Dilshodning yaqinlariga “Kichkina tabib” filmining kastingida ishtirok etishni taklif qilishadi. Doniyor roliga talabgorlar nihoyatda ko‘p bo‘lgan. Yuzdan ortiq ishtirokchilar orasidan tanlab olingan Dilshodbek Kattabekov kino olamiga dadil qadamlar bilan kirib keldi.
— Buvim 1998-yilda “O‘zbekfilm”ga olib borgan, yuzta bola qatnashgan kasting bo‘lgan. Oxirida shu rol menga nasib qilgan. Qarasam, hammasi o‘zim bir yil oldin televizorda ko‘rgan aktyorlarim bo‘lgan. Murod Rajabovni “Temir xotin”da, Rajab Adashevni “Abdullajon”da, Karim Mirhodiyevni “Charxpalak”da ko‘rganman. Bundan tashqari, Fotima Rejametova, Zikir Muhammadjonov, Munavvara Abdullayeva bor edi, borsam aktyorlar ansambli yig‘ilgan, bu ham bir baxt edi. Bu ham o‘zimni erkin his qilishimga turtki bo‘lgan, ular menga rolni ijro etishimga yordam bergan. O‘sha paytda kinolar lentada olingan, xato qilishga haqqimiz yo‘q edi. Hozirgidek emas edi, bir kun oldin yaxshilab matnni yodlab, ertasi kuni suratga olish jarayonlariga borib, holatga kirib o‘ynalgan. “Kichkina tabib”ning ham bir yutug‘i aktyorlar ansamblining jam bo‘lganidadir, jamoa zo‘r yig‘ilgan edi. Shundan keyin menga “Kichkina tabib”da chiqqan bola deb ta’rif berishadigan bo‘ldi. Kimdir ismimni bilmasa ham, Doniyor deb chaqirar edi, deydi Dilshodbek Kattabekov.
Film syomkasidagi qiziqarli holatlar
— “Kichkina tabib” filmida juda qiziqarli voqealar bo‘lgan. Birinchi voqea — Murod aka Rajabov meni ko‘tarib olib, mashinaga otib yuboradigan joylari bor. Rolga shu darajada berilib ketganlarki, ozg‘in, yengil bo‘lganim uchun otib yuborganlar, bu eshikdan kirib narigi eshikka borib urilganman. Keyin suratga olish jarayoni tugagandan keyin qattiq otmadimmi, deb so‘raganlar.
Yana bir qiziqarli voqealardan biri tepalikka chiqib, Allohga iltijo qilayotgan vaqtda itning zanjirini qo‘limga ikki-uch marta bog‘lab olganman. Bu it ham o‘rgatilmagan edi, qishloqdagi bir xonadonning iti bo‘lgan. Unga bir hafta davomida go‘sht berib o‘zimizga o‘rgatib olganmiz. Shu it bilan tepalikka chiqib ketgan vaqtimda suratga olish ishlari boshlangan, keyin esa zanjirni yechmasimdan oldin, it pastga qarab yugurib ketgan. Oxiri oyog‘im qoqilib, tikanaklarga burkanib pastga tushib borganman. O‘sha payt sovuq edi, keyin rejissyorlar yugurib kelib, avtobusga olib kirib, hamma yerimga spirt surtishgan, deydi Dilshodbek Kattabekov.
Ilk gonorari qancha bo‘lgani haqida
“Kichkina tabib” filmidagi roli uchun aktyor qancha gonorar olgan, umuman, yosh aktyorga haq to‘langanmi? Bu savol ko‘pchilikni qiziqtirishi aniq.
— “Kichkina tabib” filmidan 1998-yilda 50 ming so‘m gonorar olganman. O‘sha payt o‘zimni olib borishgan, kichkina edim. “O‘zbekfilm”ga borganman, adashmasam, buxgalter rus ayol bo‘lgan, meni ko‘tarishgan. Qog‘ozni berib, qo‘l qo‘y deyishgan, shu payt qo‘limni qog‘ozning ustiga qo‘ygan ekanman, keyin ular imzo qo‘yishim kerakligini tushuntirishgan. O‘sha payti birinchi filmimdan 50 ming so‘m olganman.
Farrux Zokirov bilan tasodifiy tanishuv
Dilshodbek Kattabekov yutuqlarida buvisining hissasi katta ekanligini, u ko‘plab tadbirlarga olib borganini yaxshi eslaydi.
— Buvim 30 yildan ortiq “O‘zbekiston” teleradiokompaniyasida boshlovchi bo‘lib ishlagan, to 2016-yilgacha shu insonning xonadonida yashab, maktabga, tadbirlarga, suratga olish jarayonlariga ham o‘sha yerdan borib yurganman. Erinmay kastinglarga olib borar, san’atkorlar bilan tanishtirardi. Shuning uchun ikki onam bor, biri Sirdaryoda, biri Toshkentda menga tarbiya bergan, deyman.
Keyin Farrux Zokirovning haydovchisi bilan ham tanishib qolganim omadim bo‘lgan. U inson bilan qarindoshdek bo‘lib ketgan edik. Shu inson “Turkiston” saroyida qo‘shiq aytib turgan paytimda yoqtirib qolib, o‘zlarining oilasiga qabul qilgan va dadamga o‘g‘lingizni o‘z o‘g‘limdek ko‘raman, degan, deydi Dilshodbek Kattabekov.
“Meni mazax qilishardi”
Aktyor bo‘yi pastligi uchun mazax qilingani va u ba’zi paytlari ota-onasidan ranjiganidan afsuslanishini eslab o‘tdi.
— Ota-onamizga qancha qilsak kam. Otamning ismi Ravshan, onamning ismi Dilorom. Dadam 1961-yilda, onam 1964-yilda tug‘ilgan. Bola bir marta kuyunsa, ota-ona o‘n marta kuyunadi, boshida qiyin bo‘lgan, chunki ota-onamning har doim oldida yuradigan farzandi tanlagan sohasi sabab uzoqda yurishi kerak bo‘lgan. Ba’zan ota-onamga og‘ir gaplarni aytib, ranjitgan paytlarim ham bo‘lgan. Bunga bo‘yimning pastligi sabab bo‘lgan. Chunki ayrim insonlar qo‘lini bigiz qilib, shaxsiyatga tegish holatlari bo‘lgan. Kamchiligimni, tashqi ko‘rinishimni aytib kulganlar ham bo‘lgan. Ko‘nglimga og‘ir botgan, uydagilarga ko‘chaga chiqmayman, ustimdan kulishyapti, san’atni ham tashlayman, deb yig‘lab aytganman. Ota-onam boshimni silab, “Ular kulsa kulaversin, sen xursand bo‘l, Alloh seni shunaqa kichkina qilib, aziz qilib qo‘yibdi”, der edi.
Hozirgi kunda bundan afsuslanmayman, sog‘lomman, oq-qorani ajratib bilaman, tengdoshlarimdek bo‘yim uzun bo‘lganda, balki bu darajada mashhurlikka erishmagan bo‘lar edim. Qaysidir ma’noda shu jussam bilan boshqa hamkasblarimning orasida ajralib turaman. Yoshimiz ulg‘aygan bo‘lsa ham, insonlar haligi bola, deb ko‘rsatadi. Hamma o‘ksinishlar, xafa bo‘lish bolalikda qolib ketgan, deydi Dilshodbek Kattabekov.
“Pulga olingan unvon kerak emas”
— 2008-yilda ham “Nihol” mukofotiga, ham san’at oliygohiga topshirganman. O‘sha payti tuman, viloyat bosqichlaridan o‘tib respublika bosqichiga yetib borganman. Hozir u odamlar lavozimida bormi yoki yo‘qmi, bilmayman. Keyin menga kelib, “Bu bosqich qiyin bo‘ladi”, deyishgan. Qaysi tomonlama desam, mablag‘ bilan bog‘liqligini aytishgan. Pul talab qilishgan, 2008-yilda 500 dollar so‘rashgan. Iste’dodimni sotib shu unvonni oladigan bo‘lsam, kerak emas, deganman. Haqiqiy unvon — xalqning mehri, e’tibori. Menga pulga olingan unvon kerak emas, deganman, deydi Dilshodbek Kattabekov.
Umra safaridagi hissiyotlari haqida
Aktyor 2022-yilda umra amallarini ado etgan. Dilshodbek Kattabekov intervyularidan birida muqaddas shaharlarda bo‘lgan paytida qanday hissiyotlarni boshdan kechirgani haqida so‘zlab bergan edi.
— U yerga borish hammaga ham nasib qilmaydi. Eshitganman, Makkaga 15 kunlik yo‘llanmani olib, u yerga 100 metr qolganda, avtobusdan tushib oyog‘i qayrilib sinib ketib, Makkani ko‘ra olmay qaytib kelganlar ham bo‘lgan. Alloh chaqiradi va bandasini sababchi qilib ko‘rsatib qo‘yadi.
Saudiya Arabistonida yashovchi o‘zbekistonlik futbolchi Jaloliddin Masharipov yaxshi taklif bildirdi, viza va yo‘l haqqini o‘zingiz ko‘taring, qolganini men qilib beraman, dedi. Mehmonxona kerak emas, mening uyim bor dedi. Yil boshidan niyat qilib, shu narsa oktyabr oyiga to‘g‘ri keldi. Bu haqda ota-onamga ketishimga bir kun qolganda aytdim.
Borganda birinchi ikki kun Madinada bo‘ldik. Madinaga borgan inson yana u yerga borgisi kelarkan. Keyin esa payshanba kuni yo‘lga chiqib Makkaga jo‘nadik. Juma namozini Makkada o‘qidik, bu ham bir baxt. Makkaga borgan inson onadan qayta tug‘ilgandek bo‘lar ekan. Darvozaga kirganda ko‘zim uzoqdan Ka’baga tushdi.
Jaloliddin Masharipov bizga vakil sifatida bir insonni qo‘shib yuborgan edi, u Umra amallarini bilar ekan. U menga qarab “Ka’bani ushlagingiz kelyaptimi?, shunday bo‘lsa ozgina sabr qiling, Allohning o‘zi yo‘l ochadi”, dedi. Meni vahima bosdi, qarasam hammaning bo‘yi mendan baland, men ularning orasida past bo‘y bilan tiqilib qoldim. Yetti marta tavof qilish jarayonida turtilib-turtilib Ka’baga qo‘limni tekkizib duo qildim.
Shaxsiy hayot
Dilshodbek Kattabekov 2023-yilning oktyabrida 33 yoshida 19 yoshli Zuhra ismli qizga uylandi. Aktyorning to‘yida o‘zbek shou-biznesining ko‘plab taniqli vakillari mehmon bo‘ldi.
— O‘zbek shou-biznesida uylanmagan men qolgandim. Shuning uchun hamkasblar, ustozlar 4-5 yildan beri qachon uylanasan, deb so‘rashayotgan edi. Shu yilga nasib qilgan ekan. Bizda ko‘pchilikda bo‘lganidek sevgi tarixi bo‘lmadi. Onam va xolalarim anchadan beri menga qiz izlashardi. Yillar davomida rosa ko‘p uchrashuvga chiqaverib, tajribam oshib qoldi. Yosh o‘taverganidan keyin injiq, odam tanlaydigan bo‘lib qolarkansiz. Avgust oyida xolam qo‘shnisining qizi bilan uchrashib ko‘rishni tavsiya qildi. Borib, qiz bilan ko‘rishib, 10 daqiqacha gaplashib o‘tirib, bir-birimizga ma’qul bo‘ldik. Shunday qilib to‘yimiz bo‘lib ketdi.
Rafiqam ijtimoiy tarmoqlardan foydalanmaydi. Faqat Telegram messenjeriga ruxsat berganman. Uchrashuvga chiqqanimda Zuhraning yerga qarab, uyalib o‘tirishi e’tiborimni tortgan. Chunki ayol kishi erkak kishi bilan gaplashganida ko‘ziga tik qarab turmasligi kerak. U xolavachchamning qo‘shnisi, Sirdaryoga borganimda 10 daqiqacha ko‘rishib suhbatlashdik. Bir-birimizga ma’qul bo‘ldik. Qaynonam mening muxlisim ekanliklari qo‘l keldi, deydi aktyor.
“San’atdan biroz uzilib qoldim”
Dilshodbek Kattabekov oxirgi paytlarda film va seriallarda suratga tushmayotgani sababi haqida ham gapirib o‘tdi.
— Film va seriallarda ancha bo‘ldi, suratga tushmayapman. Oxirgi rol ijro etgan filmim “Mahallada duv-duv gap-2” bo‘ldi. Hozir ham takliflar bo‘lyapti. Uyda ham 2-3 ta ssenariy turibdi. Lekin hozir avvalgidek yaxshi loyihalar yo‘q. “Kichkina tabib”, “Muhabbat sinovlari”ga o‘xshagan ssenariylar yo‘q. Shuning uchun ekranlarda ko‘rinmay turibman. Bundan tashqari, shaxsiy hayotimga vaqt ajratganim uchun san’atdan biroz uzilib qoldim, deydi Dilshodbek Kattabekov.
Izoh (0)