Yangi yil dasturxoniga qancha mablag‘ ajratasiz? Bozorlardagi narx-navo sizni qoniqtiryaptimi?

2024-yil yakunlanib, 2025-yil kirib kelishiga ham bir necha kunlar qoldi, xolos. Oila davrasida yig‘ilib, bu kechani nishonlashning fayzi o‘zgacha. Har bir oila dasturxonni to‘kin qilishni va bayram oldi bo‘lishiga qaramay, mahsulotlarni cho‘ntak ko‘taradigan narxda xarid qilishni xohlaydi, albatta. “Daryo” ushbu mavzuda yurtdoshlarimizga mikrofon tutdi. Javoblar doimgidek turlicha — ba’zilar bir kechalik dasturxonga 5-6 million so‘m sarflasa, kimdir 500 ming so‘mga yaxshi bozorlik qila olishini aytdi.

— Hisoblab ko‘rmaganman, ammo o‘rta hisobda 500-600 ming so‘m ketsa kerak. Qazi-qarta, ichimlik va boshqa yeguliklarga undan ham ko‘p ketadi, dedi bir oila boshlig‘i.

— Bizning oilada ancha mablag‘ sarflanadi — o‘rtacha 3-4 million so‘m, dedi yoshroq uy bekasi.

— O‘rtacha 4 million sarflaymiz, dedi yoshroq yigit. Jurnalistning bu summa juda ko‘p emasmi, degan savoliga, yo‘q, oilamiz katta, deya javob berdi.

— Avvalgi yilda 4 million so‘m mablag‘ ketdi, sababi farzandimning tug‘ilgan kuni ham bayramga yaqin bo‘lgani uchun ikkalasini birdan nishonlaymiz.

— Deyarli hech qancha ketmaydi, sababi bu bayramni nishonlamaymiz. Bolalar uchun ozroq bayram kayfiyatini berishimiz mumkin, lekin atayin dasturxon tuzab, o‘tirmaymiz, dedi boshqa bir yo‘lovchi.

— 700-800 ming so‘m, balki undan-da ko‘proq ketishi ham mumkin. Bozorlikni men qilmayman, shu sababli aniq qancha mablag‘ sarflanishini ham bilmayman, dedi uy bekasi.

Bayram oldi bozordagi narx-navo turlicha bo‘ladi — insofli sotuvchi xaridor yo‘qotmaslik uchun mahsulot narxini tushirib savdo qilsa, boshqa birov “Hozir ishlab olmasam, qachon?” degan shior bilan narxni osmonga uchiradi. Ayniqsa, bu holat sitrus meva-cheva, go‘sht va go‘sht mahsulotlari sotuvchilarida ko‘p kuzatiladi. Xo‘sh, bugungi kunda poytaxt bozorlaridagi narx-navo sizni qoniqtiryaptimi?

— Hozircha narxlar yaxshi, agar bozordagi narx juda oshib ketsa, tarmoqli supermarketlardan xarid qilamiz. Sababi ularda narxlar sun’iy ravishda ko‘tarilmaydi, dedi 30 yoshlar atrofidagi erkak.

— Qishda, albatta, hamma narsa qimmatlashadi. Oddiy xalq uchun qimmat!, dedi boshqa bir yo‘lovchi.

— Men ishlab, pul topib ayolimga olib borib beraman, bozordan oziq-ovqatni u xarid qiladi. Shu sababli bozordagi narxlardan unchalik xabarim yo‘q. Hali oylik tushgani yo‘q, tushsa qo‘liga tutqazaman, nima qilsa ham o‘zi biladi (kulib), dedi avtobus haydovchisi.

— Albatta, bayram arafasida narxlar oshib ketadi. Paytdan foydalanib olmoqchi bo‘lishadimi, bilmadim, dedi yo‘lovchi ayol.

— Menimcha, Yangi yil bayrami oldi ko‘p joyda “skidka”lar bo‘ladi, bayram yarmarkalari tashkil qilinadi, bu, albatta, yaxshi, dedi uy bekasi.

— Toshkentda qimmat, bir-bir yarim millionga juda kichik emas-u, o‘rtacha dasturxon qilsa bo‘ladi. Ammo viloyatlarda bu narxga shohona dasturxon tuzash mumkin, dedi namanganlik ayol.

— Xarid qilayotgan mahsulotingiz narxi ba’zida to‘g‘ri keladi, ba’zan cho‘ntak ko‘tarmaydi. Bayram oldi narxni oshirishadi, so‘ng yana joyiga qaytadi. Bayrammi, bayram emasmi, narx doim bir xil — tushgan holatda bo‘lsa, yaxshi bo‘lardi.

— Kecha bozor aylandim, limonning kilogrammi 10-12 ming so‘m, xurmolar uch ming so‘m ekan. Hammasi yaxshi, talabga javob beradi, dedi nafaqa yoshidagi otaxon.

Xo‘sh, siz bayram dasturxoni va xaridlar uchun qancha mablag‘ sarflaysiz? Umuman olganda, bayram oldidan narxlarni oshirish, sizningcha, to‘g‘rimi?