O‘zbekiston energotizimidagi texnik nosozliklar ortidan bozorlarda qishloq xo‘jaligi mahsulotlarining narxi keskin oshib ketishi mumkin emas. Buni qishloq xo‘jaligi vaziri o‘rinbosari Shuhrat Mirzayev Xalqaro press klubning navbatdagi sessiyasida ma’lum qildi, deb xabar beradi “Gazeta.uz”.
“Qishloq xo‘jaligi mahsulotlari yetarli darajada yetishtirilgan. O‘zimizda [ishlab chiqarilgani — tahr.] talabni qoplamaydiganlari — kartoshka yoki go‘sht mahsulotlari ham oktabr, noyabr, dekabr oylarida yetarli miqdorda omborxona, muzlatkichlarga olib kelinib, zaxira qilib qo‘yilgan. Bularni hammasi bozorlarda narx barqarorligini saqlab, asossiz narxlar oshishiga olib kelmaydi”, — deydi Mirzayev.
Qolaversa, bugungi kunda mamlakatda jami 4500 dan ortiq muzlatkichlar borligi qayd etilgan. “Eng asosiysi hozirgi muzlatgichlar zamonaviy tipda qurilgan, ya’ni, ularning hammasi loyihada dizel generatori ko‘zda tutib qurilgan. Kechagi holatda ham bir kunda dizel generatori orqali ishladi”, — deydi vazir o‘rinbosari.
Bundan tashqari, respublikada 5 ming gektardan ortiq maydonda 3,4 mingdan ortiq issiqxona mavjudligi aytildi.
“Gazdan kelgan mutaxassislarimiz ham aytyaptiki, bugun, erta muqobil energiyadan foydalanib turishsa, uyog‘iga gaz ta’minoti bilan amalga oshirilaveradi”, — deya ta’kidlaydi Shuhrat Mirzayev.
Avvalroq Toshkent shahri aholisining asosiy qismini ichimlik suvi bilan ta’minlovchi “Qodiriya” bosh suv inshootida yuqori kuchlanishli elektr ta’minotida nosozlik sababli nasos agregatlarida o‘chish holati yuzaga kelgan edi. Shu tufayli Toshkent shahrining qator hududlarida ichimlik suv ta’minoti bilan bog‘liq uzilishlar kuzatilmoqda. Uy-joy kommunal xizmat ko‘rsatish vaziri o‘rinbosari Qurbon Tursunov 26-yanvar kuni soat 18:00 ga qadar respublika bo‘yicha issiq va sovuq suv ta’minoti to‘liq tiklanishini ma’lum qilgandi.
Izoh (0)