Bugun, 2-may, payshanba kuni “Daryo” muxbiri Afg‘oniston shimolidagi Balx viloyatining Mozori Sharif shahridagi eng yirik bozorlardan birida bo‘lib, qishloq xo‘jaligi mahsulotlarining narxlari haqida ma’lumot to‘pladi.
Bozordagi ba’zi sotuvchilar “Daryo” muxbiri bilan suhbatda savdodan ko‘ngillari to‘q ekanini ma’lum qilgan bo‘lsa, yana ba’zi sotuvchilar ish yo‘qligi tufayli vaqtinchalik bu ish bilan shug‘ullanayotganini aytib o‘tdi.
Bir necha yillardan beri banan sotib kelayotgan Mohibullaning fikricha, meva savdosi unchalik yaxshi emas, garchi mevaning narxi qo‘shni davlatlarga nisbatan bir necha barobar arzon bo‘lsa ham. Aholi qashshoqlikdan aziyat chekayotgani uchun mevani ko‘p xarid qila olmaydi.
Uning so‘zlariga ko‘ra, bu biznes katta daromad keltirmaydi. Mohibulla faqatgina uy-ro‘zg‘or xarajatlarini qoplab turish uchungina bu ishni davom ettirmoqda.
Yana bir sotuvchi Muhammad Yoqub asli Afg‘onistonning Faryob viloyatidan bo‘lib, Mozori Sharif shahrida piyoz va kartoshka sotadi.
“Daryo” muxbiri undan piyoz savdosi, narxi va bozori haqida so‘raganda, Muhammad Yoqub bu yil piyoz juda arzon bo‘lib ketganini, bunga sabab qo‘shni davlatlarga, xususan, Pokistonga eksport qilinmayotgani, deb aytgan.
Uning aytishicha, bozordagi vaziyatga qarab, baʼzida Afg‘onistondan O‘zbekistonga piyoz jo‘natilgan, ayrim hollarda esa O‘zbekistondan Afg‘onistonga olib kelingan.
“O‘zbekistondan bir mashina piyoz olib keldik, bu piyozni oladigan xaridor yo‘q, bir kilo o‘zbek piyozi Mozori Sharifda 5 afg‘oni, ya’ni 0,069 dollarga sotilmoqda, bu fermerlarning kelgusi yilda piyoz ekmasligiga sabab bo‘ladi”, deydi u.
Muhammad Yoqubning so‘zlariga ko‘ra, o‘tgan yili bir kilogramm piyoz bir dollardan sotilgan.
“Daryo” muxbiri Mozori Sharif shahrida turli mahsulotlarning bugungi kundagi narxi haqida ma’lumot berdi.
Meva va poliz mahsulotlari
- 1 kg apelsin — 1 dollar;
- 1 kg mandarin — 1,66 dollar;
- 1 kg kivi — 2,22 dollar;
- 1 kg ananas — 5,55 dollar;
- 1 kg limon — 1,39 dollar;
- 1 kg banan — 2 dollar;
- 1 kg olma — 1,39 dollar;
- 1 kg dovuchcha — 1,94 dollar;
- 1 kg limon qulupnay — 1,95 dollar;
- 1 kg tarvuz — 0,50 dollar;
- 1 kg shaftoli — 1,94 dollar;
- 1 kg O‘zbekiston gilosi — 5 dollar.
Sabzavotlar va ko‘katlar
- 1 kg bulg‘or qalampiri — 1 dollar;
- 1 kg pomidor — 0,55 dollar;
- 1 kg baqlajon — 0,69 dollar;
- 1 kg ismaloq — 0,40 dollar;
- 1 kg bodring — 0,30 dollar;
- 1 kg qovoqcha — 0,40 dollar;
- 1 kg sabzi — 0,40 dollar;
- 1 kg karam — 0,70 dollar;
- 1 kg kartoshka — 0,30 dollar;
- 1 kg afg‘on piyozi — 0,14 dollar;
- 1 kg O‘zbekiston piyozi — 0,069 dollar.
Dukkakli o‘simliklar
- 1 kg O‘zbekiston no‘xati — 1,53 dollar;
- 1 kg mosh — 1 dollar;
- 1 kg oq loviya — 1,8 dollar;
- 1 kg qizil loviya — 1,66 dollar;
- 1 kg Hindiston guruchi —1,40 dollar;
- 1 kg afg‘on guruchi — 1 dollar;
- 1 kg qizil mayiz — 2 dollar.
Go‘sht
- 1 kg mol go‘shti — 5,27 dollar;
- 1 kg qo‘y go‘shti — 5,55 dollar;
- 1 kg tovuq go‘shti — 2,77 dollar.
Boshqa mahsulotlar
- 1 kg afg‘on makaroni — 0,76 dollar;
- 1 kg Qozog‘iston makaroni — 0,90 dollar;
- 1 kg Eron tomati — 1,40 dollar;
- 1 kg afg‘on tomati — 1,11 dollar;
- 1 kg un — 0,35 dollar;
- 1 kg shakar — 0,90 dollar.
Shuni ta’kidlash kerakki, ushbu mahsulotlarning narxi doimo o‘zgarib turadi.
Ma’lumot uchun, 1 AQSH dollari ayni paytda 72,5 afg‘oniyni tashkil qiladi.
Izoh (0)