Dubay o‘zining hashamat va osmono‘par binolar shahri imijiga qaramasdan byudjet doirasida hordiq chiqarish uchun g‘aroyib imkoniyatlarni taklif qilmoqda. Bu yerda har qanday hamyonga mos keladigan mehmonxonalar, restoranlar va ko‘ngilochar maskanlarni topish mumkin. Demak, mablag‘laringiz cheklangan sharoitda ham unutilmas taassurotlar bilan sayohat qilish imkoniyati bor.
Yashash bo‘yicha xarajatlarni qanday tejash mumkin
Dubayda lyuks mehmonxonalar bilan bir qatorda ko‘plab nisbatan arzonroq yashash variantlari mavjud. JBR, Dubai Marina, Jumeirah va Eski Dubay kabi ommabop sayyohlik hududlarida mavsumga qarab bir kecha uchun 250 dirhamdan boshlanadigan narxda qulay yashash sharoitiga ega joylarni topish mumkin. Ommabop va uncha qimmat bo‘lmagan mehmonxonalar orasida Jumeyra hududida joylashgan Rove Dubai Marina, Ibis Styles Dubai Jumeirah va Rove La Mer Beach mehmonxonalarini qayd etish joiz.
O‘ziga xos muhitni izlayotganlar uchun esa tarixiy Al-Faxidiy tumanida joylashgan Bur-Dubayda XVA Art Hotel va Al Seef Heritage Hotel Dubai, Curio Collection by Hilton mehmonxonalari noyob madaniy muhitga ega shinamgina xonalarni taklif etadi. Yolg‘izlik va qulaylikni yoqtiradiganlar uchun esa 18 yoshdan katta mehmonlar uchun mo‘ljallangan Dubai World Islands orollarida joylashgan Voco Monaco Dubai mehmonxonasi ideal tanlovga aylanishi shubhasiz.
Shu bilan birga ko‘p sonli xostellardan birini tanlash yoki apartamentlarni qisqa muddatli ijaraga olish imkoniyatini ham ko‘rib chiqish mumkin. Dubayda Airbnb ilovasi ishlaydi, shuningdek, mahalliy Bayut va dubizzle ilovalari ham bor. Oshxonasi bor apartamentlarda yashash qahvaxonalar va restoranlarda ovqatlanish xarajatlarini tejashga yordam beradi.
Agar mehmonxonada to‘xtashni rejalashtirgan bo‘lsangiz, sayyohlarga qo‘shimcha bonuslarni taklif qiladigan mehmonxonalarga e’tibor qarating. Bu plyajlarga va savdo markazlariga bepul transfer, muzeylar yoki tadbirlarga chiptalar, ovqatlanish bo‘yicha apgreyd, 12 yoshgacha bo‘lgan bolalarni bepul joylashtirish va boshqalar bo‘lishi mumkin.
Narxning shakllanishida mavsum katta ahamiyatga ega. Dam olish sanalarini tanlashda bayram sanalaridan – Rojdestvo va Yangi yil ta’tillari, uzoq muddatli bayram dam olish kunlari, Pasxa bayramlaridan qochishga harakat qiling. Bunday sanalarga to‘g‘ri kemaydigan paytda amalga oshiriladigan safarlar nafaqat yashash, balki samolyotda parvoz qilish xarajatlarini ham tejash imkonini beradi.
Bundan tashqari, tejashga yana safarni oldindan rejalashtirish ham yordam beradi – oldindan bron qilib qo‘yilganida mehmonxonalarning ko‘pchiligi chegirmalar beradi va paketga qo‘shimcha xizmatlarni ham kiritadi.
Dubayning bepul plyajlari
Dubayda ko‘plab bepul shahar plyajlari mavjud. Ulardan eng ommabopi – Kite Beach. Bu yerda kaytsyorfing, vindsyorfing, sapsyorfing bilan shug‘ullanish yoki shunchaki oilangiz bilan dengizda cho‘milib kunni tinch o‘tkazish mumkin. Shaharda tamaddi qilib olish yoki dengizni va quyosh botishini tomosha qilgan holda kechqurun ovqatlanish mumkin bo‘lgan turli qahvaxonalar va restoranlar faoliyat ko‘rsatadi.
Hayotingizdagi unutilmas quyosh botishini tomosha qilish mumkin bo‘lgan yana bir maskan – bu Sunset Beach. Plyajdan Burj Al Arab binosiga chiroyli manzara ochiladi, bu esa ta’tildan ajoyib fotosuratlarni olib kelish imkoniyati degani.
Jumeirah Public Beach (uni Nessnass Beach ham deyishadi) plyajida suv sport turlari bilan shug‘ullanish yoki oilangiz va do‘stlaringiz bilan kunni xotirjam o‘tkazish mumkin.
Yuqorida tilga olingan plyajlarning hammasida kuchli projektorlar bilan yoritiladigan tungi cho‘milish zonalari bor.
JBR’da joylashgan The Beach plyaji shu hududda yashaydiganlar orasida ommabop. Plyajdan Bluewater oroliga go‘zal manzara ochiladi, orolgacha piyoda sayr qilish mumkin. Plyaj yonida tramvay bekati joylashgan, shu bois unga jamoat transportida ham osongina yetib olish mumkin.
Palm West Beach – bu Palm Jumeirah orolidagi bepul plyaj zonasi. Bu yerda quyosh, qum va dengizdan bahra olib, xiyobon bo‘ylab sayr qilgan yoki ko‘p sonli qahvaxonalardan birida tushlik qilgan holda kunni qulay o‘tkazish mumkin.
Al Mamzar plyajida sizni nafaqat dengiz va qum, balki park zonalari ham kutadi. U yerda, masalan, barbekyu tashkil qilish mumkin. Plyajga kirish narxi bor-yo‘g‘i 5 dirham.
Dubayning bepul va uncha qimmat bo‘lmagan diqqatga sazovor maskanlari
Dubay faqat plyajlardan iborat emas, albatta. Shaharda har qanday didga mos keladigan ko‘ngilxushlikni va ko‘plab diqqatga sazovor joylarni topish mumkin. Ularning aksariyati bepul.
Dubay bo‘ylab sayohatingizni Dubai Mall savdo markazidan boshlang. Bu yerda ulkan Dubai Aquarium & Underwater Zoo akvariumining shisha devori orqali skatlar va akulalarni, diplodokning yaxshi saqlangan skeleti qoldiqlarini tomosha qilishingiz, China Town mavzesi bo‘ylab sayr qilishingiz mumkin. Dubai Mall maydonidan dunyodagi eng baland Burj Khalifa minorasiga aqlni shoshiradigan manzara ochiladi, kechqurunlari esa har yarim soatda raqsga tushuvchi Dubai Fountain favvoralarining katta shousi o‘tkaziladi.
Quyida e’tiboringizga bepul tashrif buyurish mumkin bo‘lgan yana bir nechta diqqatga sazovor maskanni ko‘rsatib o‘tamiz:
- Al Fahidi tarixiy mavzesi, bu yerda 50 ga yaqin qadimiy binolar saqlanib qolgan
- Sheikh Mohammed Centre for Cultural Understanding (SMCCU) madaniy markazi
- Coffee Museum qahva muzeyi
- Coins Museum tangalar muzeyi
- Dubai Festival City Mall majmuasida Ginnes rekordlari kitobiga kiritilgan va har kuni namoyish etiladigan Imagine lazer shousi
- Dubai Creek majmuasidagi The Viewing Point tomosha maydoni
- Dubai Marina sayr xiyoboni
- Souk Madinat savdo markazi
- Flamingolar yashaydigan Ras Al Khor Wildlife qo‘riqxonasi
- Al Qudra sahrosi, bu yerda Flamingo Lake va Love Lake ko‘llari bo‘yida piknik tashkil qilish hamda mahalliy tabiat va jonivorlar bilan yaqindan tanishish mumkin
- Xattda joylashgan Hatta Heritage Village tarixiy qishlog‘i
Dubayning uncha qimmat bo‘lmagan diqqatga sazovor joylari orasida Global Village yarmarkasini, Dubai Frame tomosha maydonini, sahro bo‘ylab ekskursiyalarni, Dubai Creek’da abra qayig‘ida sayrni ko‘rsatib o‘tish mumkin.
2024-yilning 6-dekabridan 2025-yilning 12-yanvariga qadar Dubayda an’anaviy Dubai Shopping Festival shoping festivali o‘tkaziladi. Festival davrida Dubay aholisi va mehmonlarini do‘konlar, restoranlar va mehmonxonalarda nafaqat chegirmalar, balki bepul kontsertlar va shoular ham kutadi. Ulardan biri – dronlar shousi. U har kuni JBR va Bluewaters hududida o‘tkaziladi. Ushbu shouni ham mutlaqo bepul tomosha qilish mumkin. Kontsertlar jadvali bilan festival saytida tanishsa bo‘ladi.
Dubayda shoping va ovqatlanish xarajatlarini qanday tejash mumkin
Shoping – Dubayga har qanday safarning ajralmas qismi. Qish mavsumida mehmonlar uchun shoping juda manfaatli bo‘ladi. Dubai Shopping Festival davrida do‘konlardagi chegirmalar 90% gacha yetadi.
Mislsiz chegirmalar Dubayning barcha savdo markazlaridagi turli do‘konlarda amal qiladi. Aksiyalardan tashqari festival ishtirokchilarini turli o‘yinlar ham kutadi, ularda yirik pul summalarini va, hatto, avtomobil yutib olish mumkin.
Dubayda manfaatli shopingni nafaqat mavsumiy chegirmalar davrida amalga oshirsa bo‘ladi. Masalan, Brands For Less do‘konlar tarmog‘ida brend buyumlarni juda hamyonbop narxlarda topish mumkin. Istalgan do‘kondan kiyim-kechak va poyabzal xarid qilar ekansiz, do‘kon xodimlaridan amal qilayotgan aksiyalar haqida albatta so‘rang.
Agar sizni oziq-ovqat mahsulotlari qiziqtirsa, eng yaxshi narxlarni Deira hududidagi Waterfront Market bozorida topasiz. Bu yerda tirik baliq, go‘sht, meva va sabzavotlar hamda baqqollik mahsulotlarini do‘konlarga qaraganda ancha arzon narxlarda xarid qilish mumkin.
Shuningdek, Lulu, Viva supermarketlarini ham hamyonbop deyish mumkin, assortiment va narx nisbati borasida esa Carrefour supermarketlari ma’qul.
Ripe Market mavsumiy yarmarkasi haqida ham unutmang. Bu nisbatan arzon narxlarda organik va mavsumiy mahsulotlar sotiladigan gavjum bozor. Unda hunarmandchilik buyumlarini ham topish mumkin, dam olish kunlari esa bu yerda ko‘ngilochar dastur faoliyat ko‘rsatadi.
Dubay bir necha bor dunyoning eng yirik pazandalik markazlaridan biri sifatida e’tirof etilgan. Shaharda jahonning barcha milliy taomlarini taqdim etuvchi restoranlar mavjud bo‘lib, ularning ayrimlari Michelin yulduzlari bilan qayd etilgan.
Hamyonbop ovqatlanish variantlari ham bor. Savdo markazlarida fudkortlar faoliyat ko‘rsatadi, ularda tarmoqli mashhur ovqatlanish muassasalarini ham, o‘ziga xos hind, arab oshxonalarini ham uchratish mumkin.
Yirik supermarketlarning aksariyatida tayyor ovqat variantlari taklif etiladi. Taomni mustaqil tanlash (masalan, Dubai Mall majmuasidagi Spinney’s yoki Carrefours Mall of The Emirates) yoki peshtaxtadan tayyor va qadoqlangan taomni olish (Waitrose, Carrefour, Grandiose) ham mumkin. Supermarketlarning ko‘pchiligida qahvaxona zonasi bor, ularda, jumladan, issiq taomlar, pitssa va shaurma tayyorlanadi.
Amirlik taomlarini tatib ko‘rishni ham unutmang. Ularni taklif qiladigan yemakxonalarni tarixiy Al Fahidi mavzesida yoki Global Village yarmarkasida uchratish mumkin.
Dubayda hamyonbop transport
Harakatlanishning eng arzon va oson usuli – bu jamoat transporti. Dubayda metro faoliyat ko‘rsatadi, uning o‘zi diqqatga sazovor joy hisoblanadi. Metroda yuradigan poezdni mashinist boshqarmaydi, u avtomat tarzda boshqariladi. Metro yo‘nalishi yer ustidan o‘tadi, bekatlar esa Dubayning deyarli barcha diqqatga sazovor maskanlari yonida joylashgan.
Dubayda metrodan tashqari tramvay, avtobuslar hamda daryo tramvayi ham yuradi. Aytish joizki, daryo tramvayi – Dubay ko‘rfazi bo‘ylab arzon ekskursiya uchun eng yaxshi variant.
Palm Jumeirah orolida ham qiziqarli transport turi – monorels harakatlanadi. Uning yo‘nalishi butun orol bo‘ylab o‘tadi va Nakheel Mall savdo markazining yonida yakunlanadi.
Jamoat transportida yurish uchun chipta yoki Nol kartasini sotib olish lozim, kartaning balansini to‘ldirib turish mumkin. Transport jadvali va yo‘nalishlari bilan RTA saytida tanishsa bo‘ladi.
Reklama huquqi asosida.
Izoh (0)