Qishloq xo‘jaligi vazirligi 2026-yilda O‘zbekistonda mahalliy yangi parranda zoti paydo bo‘lishini ma’lum qildi.
Qishloq xo‘jaligi vaziri Ibrohim Abdurahmonov Samarqand viloyatiga ishchi tashrifi davomida Samarqand tumanidagi “Navobod naslli parranda” fermer xo‘jaligida bo‘lib, agroparranda klasteri loyihasi taqdimoti bilan tanishgan.
Mazkur xo‘jalik yiliga 17 ming tonna parranda go‘shti yetishtiradi hamda 75 million dona inkubator jo‘jasini ochiradi. Yangi agroparranda klasteri ishga tushgach, 100 ming bosh naslli ota-ona galasi, 5 million bosh ikkinchi tartibli naslli parranda, 875 million dona inkubatsion tuxum, 700 million bosh bir kunlik jo‘ja va 1 million tonna parranda go‘shti yetishtirish ko‘zda tutilgan.
“Eng e’tiborlisi, 2026-yilda O‘zbekistonda mahalliy yangi parranda zoti paydo bo‘ladi”, deyiladi vazirlik xabarida.
Buning uchun zarur bo‘lgan 700 million tonna ozuqa ishlab chiqarish kooperatsiya asosida yo‘lga qo‘yiladi. Natijada yillik eksport hajmi 180 million AQSh dollariga yetishi kutilmoqda.
Vazir loyiha bilan tanishib, uning istiqbollari yuzasidan mas’ullar bilan fikr almashdi. Shuningdek, Sirdaryo va Jizzax viloyatlarida ham faoliyatni kengaytirish masalalari ko‘rib chiqilayotgani qayd etildi. Samarqand viloyatining uchta tumanida “Bir mahalla – bir mahsulot” tamoyili asosida jo‘ja yetishtirish va ularning ozuqasini ta’minlash bo‘yicha ishlar boshlangan.
Xabarda aytilishicha, bu tizim mahalla aholisining daromadini oshirishga ham xizmat qilmoqda. Misol uchun, bir oila 40 kun davomida 500 bosh jo‘jani yetishtirib, 9 million so‘mgacha sof foyda olishi mumkin. Ayni paytda ushbu loyihaga qiziqish bildirayotganlar soni ortib bormoqda.
Avvalroq O‘zbekistonning barcha hududlarida parrandachilikning go‘sht va tuxum yo‘nalishida kooperatsiya tizimi asosida 1 million aholini ish bilan ta’minlash bo‘yicha “Parranda boqish – daromad topish” loyihasi amalga oshirilishi haqida xabar berilgan edi. 2030-yil 1-yanvarga qadar parrandachilik mahsulotlari ishlab chiqaruvchi tadbirkorlik subyektlarini yuridik shaxslardan olinadigan yer solig‘ini (ekin maydonlaridan tashqari) to‘lashdan ozod etish taklif qilingan.
Izoh (0)