Germaniyada “Zokir Abdusattor bolalari” nomli xalqaro xayriya jamg‘armasi o‘z faoliyatini boshladi, deb xabar qilmoqda “Dunyo” axborot agentligi.
Qayd etilishicha, mazkur xayriya tashkiloti O‘zbekistondagi kam taʼminlangan va ijtimoiy himoyaga muhtoj bolalarga tibbiy yordam ko‘rsatish, ularning sog‘lig‘ini tiklash va reabilitatsiyasini tashkil etish maqsadida tuzilgan.
Jamg‘arma Frankfurt-Mayn shahrida yashagan va xayriya ishlari bilan tanilgan Zokir Abdusattor xotirasiga ochildi. U o‘zbek bolalari uchun qator saxovatli loyihalarni amalga oshirgan, mazkur xayriya jamg‘armasi esa uning ezgu ishlarini davom ettirishga xizmat qilishi kutilmoqda.
Jamg‘armaning asosiy vazifalaridan biri O‘zbekistondagi jismoniy va ruhiy rivojlanishida nuqsonlari bo‘lgan, onkologik va nevrologik kasalliklarga chalingan bolalarga zamonaviy tibbiy yordam ko‘rsatishdan iborat. Xususan, ADHS, ADS, autizm, ZPR va onkologik kasalliklarga duchor bo‘lgan bolalarni davolashda Germaniyadagi yetakchi mutaxassislarni jalb qilish rejalashtirilgan.
Jamg‘arma o‘z oldiga bolalarni bepul tekshiruvdan o‘tkazish, tashxis qo‘yish va davolash, mahalliy tibbiyot muassasalarini zamonaviy tibbiy uskunalar hamda diagnostik apparatlar bilan taʼminlash, og‘ir kasallikka chalingan bolalar uchun Germaniyaning nufuzli klinikalarida davolanish imkoniyatlarini yaratish kabi maqsadlarni qo‘ygan.
O‘tgan yili Rossiyada buxorolik ayol operatsiya qilingan 8 oylik chaqalog‘ini shifoxonaga pul to‘lamagani sababli mamlakatga olib kelolmayotganini aytgan edi. Shundan so'ng bolaning shifoxonada tibbiy muolajalari uchun to‘lov qisqa fursatda O‘zbekiston yirik tadbirkorlaridan bo‘lgan homiy tomonidan to‘lab berilgandi.
Izoh (0)