2003-yilda Edrian Broudi 29 yoshida “Eng yaxshi erkak roli” nominatsiyasida “Oskar” mukofotining eng yosh sohibi bo‘ldi. 22 yildan so‘ng u yana bu nufuzli mukofotga sazovor bo‘ldi — rejissyor Breydi Korbening “Brutalist” filmidagi roli uchun. Aktyorning shu yillar davomida nimalar bilan mashg‘ul bo‘lgani va tomoshabinlar uni nima uchun sevishi haqida so‘z yuritamiz.
O‘zini yangi rollarda sinab ko‘rdi
Edrian Broudi ijodkorlar oilasida dunyoga kelgan: onasi Silviya Plachi fotojurnalist bo‘lib, u o‘z suratlarini AQSH va boshqa mamlakatlarning eng nufuzli jurnallarida chop ettirgan, otasi Elliot Broudi esa ilmiy doiralarda karyera qurgan — u professor va rassom hisoblanadi. Edrian bolaligidanoq sahnaga qiziqish bildirgan: atrofdagilarning xatti-harakatlari va yuz ifodalarini takrorlagan, kichik sahna ko‘rinishlarini ijro etgan va hatto bayramlarda Ajoyib Edrian taxallusi ostida fokuslar namoyish qilgan.
Broudi 12 yoshidayoq teatrda rol o‘ynab, bir yil o‘tib televideniyeda debyut qilgan. Yoshligida u Fiorello H.LaGuardia san’at maktabining drama bo‘limiga o‘qishga kirib, tez orada talabgir aktyorga aylangan. U Spayk Li (“Semning qonli yozi”), Stiven Soderberg (“Tog‘ hukmdori”) va Terrens Malik (“Nozik qizil chiziq”) bilan hamkorlik qilgan.
Biroq Broudiga olamshumul shuhratni Roman Polanskining “Pianinochi” filmidagi bosh rol olib keldi. “Oskar”dagi g‘alabadan so‘ng Broudi turli janrlarda ijod qilishni davom ettirdi: u M. Nayt Shyamalanning “Sirli o‘rmon” trillerida, Piter Jeksonning “King Kong” sarguzasht-jangovar filmida, Ues Andersonning bir nechta asarlarida va hatto “Merosxo‘rlar”, “Shelbilar oilasi” kabi seriallarda ham rol o‘ynadi. Muvaffaqiyatga erishganiga qaramay, Broudi bir paytlar “Pianinochi” kabi uni o‘ziga jalb qiladigan loyihani izlayotganini his qilardi. Yillar o‘tib, “Brutalist” aynan shunday film bo‘ldi.
Energiyasini ezgu ishlarga yo‘naltirgan
Kino Broudining hayotidagi bir qism, xolos. U 30 yildan ortiq vaqtdan buyon musiqa bilan shug‘ullanib, rasmlar chizib kelmoqda.
Menda ijod qilishga ehtiyoj bor. Men kuch-quvvatimni ezgulik va bunyodkorlikka yo‘naltirmoqchiman va uni behuda sarflamaslikka intilyapman. Men shu maqsadda yashayapman, deydi u.
Ijodiy ishtiyoq uning barcha faoliyatlarida, xoh aktyorlik bo‘lsin, xoh rassomlik, xoh xayriya tashabbuslari bo‘lsin, namoyon bo‘ladi.
Rassomlikni zabt etib, endi rejissyor bo‘lishni istamoqda
Broudi uchun rangtasvir shunchaki sevimli mashg‘ulot emas, balki o‘zini ifoda etish usulidir. U his-tuyg‘ular va g‘oyalarni o‘rganishga imkon beradigan meditativ jarayon hisoblanadi. Aktyorning fikricha, matodagi xatolar yangi kashfiyotlarga yo‘l ochadi, rangtasvir esa unga o‘zini aktyorlik mahoratidan kam bo‘lmagan darajada to‘liq ifoda etishga yordam beradi. Shuningdek, Broudi o‘zini rejissyorlikda sinab ko‘rishni orzu qiladi, ammo hozircha yangi ish boshlashga erta deb hisoblaydi.
San’at uchun fidokorlik
Broudi san’at yo‘lida ko‘p narsaga tayyor. Masalan, u “Yolg‘iz bo‘ri” filmiga butun kuch-g‘ayratini sarflashga jur’at etdi: Broudi nafaqat ssenariy yozib, bosh rolni ijro etdi, balki filmni o‘zi ishlab chiqardi va unga musiqa ham bastaladi. Oxir-oqibat sarmoyalar kutilgan natijani bermadi, biroq bu Broudiga orttirgan tajribasidan mamnun bo‘lishiga va zarur xulosalar chiqarishiga xalaqit qilmadi.
Boshqa loyihalarda Broudi ko‘pincha tryuklarni o‘zi bajargan, ekstremаl sharoitlarga duch kelgan va hatto qurt-qumursqalarni ham yegan. Broudi qiyinchiliklarni yoqtiradi va haqiqiy mahorat to‘liq fidoyilikni talab etishiga ishonadi. Natija har doim ham kutilganidek bo‘lmasa-da, u bu yo‘ldan qaytmaydi.
Qal’ani qayta tiklash bilan shug‘ullangan
2007-yilda Brodi Nyu York shtatining qishloq hududidagi qadimiy mulk — Stone Barn Castle’ni sotib oldi. Bu joy ilgari sut fermasi bo‘lgan, ammo vaqt o‘tishi bilan bino qarovsiz qolgan edi. Qal’a kelinchak — Elsa Patakiga sovg‘a sifatida olingan, biroq qal’ada o‘tkazilgan bayramona fotosessiyadan olti oy o‘tgach, juftlik munosabatlarini tugatganini e’lon qildi va bino Brodining mulki bo‘lib qoldi. Aktyor uyni o‘zining shaxsiy loyihasiga aylantirib, uni qayta tiklashga kirishdi va bu ish ustida 15 yildan oshiq vaqtdan beri ishlayapti. U materiallarni o‘zi tanlaydi, butun dunyo bo‘ylab detallarni qidiradi va uyga nafaqat qalbini, balki deyarli barcha topgan pullarini ham sarflayapti.
Bir muddat aktyor qal’ani tiklash bilan shug‘ullangan, biroq unda doimiy yashamas, ko‘proq ko‘chmanchi hayot tarzini kechirardi. 2021-yilda esa u Nyu Yorkdagi boshpanasini va matbuotga ma’lum bo‘lmagan boshqa turar joylarini tark etib, Harvi Vaynshteynning sobiq xotini Jorjina Chapman va uning ikki farzandi bilan qishloqda oilaviy hayot qurish uchun ko‘chib keldi. Qal’a Broudi uchun ham uy, ham ijod maskaniga aylandi — ta’mirlash ishlari hali ham davom etmoqda va, aktyorning fikricha, bu jarayon unga zavq berishi sababli balki hech qachon yakuniga yetmasligi mumkin.
Qarovsiz itlarni qutqargan
Broudi bolaligidanoq uysiz hayvonlarga yordam berib kelgan.
Men har doim hayvonlarni yaxshi ko‘rganman, deydi aktyor. Agar siz hayvonlarga hurmat ko‘rsatadigan odamlar bilan birga o‘sgan bo‘lsangiz, ertami-kechmi, bu qarash qalbingizda ildiz otadi, deydi aktyor
Broudi ko‘pincha ko‘chadan qarovsiz kuchukchalarni uyga olib kelardi, onasi Silviya Plachi esa doimo o‘g‘lini qo‘llab-quvvatlardi, ba’zida o‘zi ham itlarni uyga olib kelar va xayriya tadbirlarida faol qatnashardi. Broudi birinchi qutqargan itlaridan biriga Betxoven deb nom bergan (hatto shu nomdagi film chiqishidan oldin). Bugungi kunda aktyor kulib turib, o‘zida butun boshli “hayvonot bog‘i” borligini tan oladi: uning uyida bir it va to‘rtta mushuk, hovlisida esa eshaklar va otlar bor.
Dorivor o‘tlar kolleksiyasini to‘plagan
Sahna ortida Broudi noan’anaviy tibbiyotga qiziqish bildiradi. Uning pardozxonasida o‘simliklardan tayyorlangan o‘nlab aralshma va ekstraktlar solingan shishachalarni ko‘rish mumkin. Aktyor tabiiy vositalar bilan jasoratli tajribalar o‘tkazadi va ta’siri faqat psixosomatik bo‘lsa ham, bu unga tetiklashish uchun yordam berishini ta’kidlaydi. “Menga bu kundalik odat shunchaki yoqadi”, deydi u.
O‘z shuhratini qayta idrok etdi
29 yoshida Broudi o‘zini voyaga yetgan va barcha kerakli cho‘qqilarni zabt etgan deb hisoblardi, ammo vaqt o‘tishi bilan “shon-shuhrat uchun sharaflar” g‘oyasi unga tobora shubhali tuyula boshladi. Hozirda Broudi o‘z mashhurligini eng avvalo murakkab obrazlarni yaratish va hikoyalar so‘zlash imkoniyati uchun qadrlamoqda. “Men go‘zal tashqi ko‘rinishga ega aktyor sifatida emas, balki buyuk aktyor sifatida tanilishni istardim”, deydi u. Broudi o‘tgan “Oskar” marosimidagi nutqini ham kasbi haqidagi mulohazalarga bag‘ishladi:
Aktyorlik juda nozik kasb. Faoliyatingizning qaysi bosqichida bo‘lishingiz yoki nimaga erishganingizdan qat’i nazar, bularning barchasi yo‘q bo‘lib ketishi mumkin. Menimcha, bu kechaning eng muhim jihati — buni anglash va hali ham sevgan ishimni qilishim kerakligi uchun minnatdorlik his etishdir.
Izoh (0)