Германияда “Зокир Абдусаттор болалари” номли халқаро хайрия жамғармаси ўз фаолиятини бошлади, деб хабар қилмоқда “Дунё” ахборот агентлиги.
Қайд этилишича, мазкур хайрия ташкилоти Ўзбекистондаги кам таъминланган ва ижтимоий ҳимояга муҳтож болаларга тиббий ёрдам кўрсатиш, уларнинг соғлиғини тиклаш ва реабилитациясини ташкил этиш мақсадида тузилган.
Жамғарма Франкфурт Майн шаҳрида яшаган ва хайрия ишлари билан танилган Зокир Абдусаттор хотирасига очилди. У ўзбек болалари учун қатор саховатли лойиҳаларни амалга оширган, мазкур хайрия жамғармаси эса унинг эзгу ишларини давом эттиришга хизмат қилиши кутилмоқда.
Жамғарманинг асосий вазифаларидан бири Ўзбекистондаги жисмоний ва руҳий ривожланишида нуқсонлари бўлган, онкологик ва неврологик касалликларга чалинган болаларга замонавий тиббий ёрдам кўрсатишдан иборат. Хусусан, ADHS, ADS, аутизм, ZPR ва онкологик касалликларга дучор бўлган болаларни даволашда Германиядаги етакчи мутахассисларни жалб қилиш режалаштирилган.
Жамғарма ўз олдига болаларни бепул текширувдан ўтказиш, ташхис қўйиш ва даволаш, маҳаллий тиббиёт муассасаларини замонавий тиббий ускуналар ҳамда диагностик аппаратлар билан таъминлаш, оғир касалликка чалинган болалар учун Германиянинг нуфузли клиникаларида даволаниш имкониятларини яратиш каби мақсадларни қўйган.
Ўтган йили Россияда бухоролик аёл операция қилинган 8 ойлик чақалоғини шифохонага пул тўламагани сабабли мамлакатга олиб келолмаётганини айтган эди. Шундан сўнг боланинг шифохонада тиббий муолажалари учун тўлов қисқа фурсатда Ўзбекистон йирик тадбиркорларидан бўлган ҳомий томонидан тўлаб берилганди.
Изоҳ (0)