Endilikda jismoniy shaxslar faqat o‘zi yoki yaqin qarindoshi manfaati uchun xayriya yig‘ishi mumkin bo‘ladi

Qonunchilik palatasi yig‘ilishida homiylik faoliyatini amalga oshirish tartibini takomillashtirishga qaratilgan qonun loyihasi ko‘rib chiqildi.

Qonun loyihasida homiylik tashkilotlari, ya’ni NNT, shuningdek, homiylikni amalga oshiruvchi va homiylik oluvchi yuridik shaxslar tomonidan xayriyalarni naqd, naqdsiz va mol-mulk shaklida yig‘ishning aniq tartibi belgilanmoqda.

Xayriyalar agar naqd pul shaklida yig‘iladigan bo‘lsa, buni faqat xayriya qutisi yordamida yoki homiylik tashkilotlari, homiylikni amalga oshiruvchi yoki oluvchi yuridik shaxslarning bank hisobvaraqlariga pul o‘tkazish yo‘li bilan amalga oshirish lozim bo‘ladi. 

Agarda xayriyalar mol-mulk shaklida yig‘ilsa, qabul qilib olingan mol-mulk ro‘yxati shakllantiriladi hamda uning turi, miqdori ko‘rsatilgan holda dalolatnoma tuziladi.  

Xayriyalarni yig‘ish ochiq va shaffof o‘tadi. Buning uchun jarayonlar boshlanishi va yakuni bo‘yicha ma’lumotlar OAV, rasmiy veb-saytlar yoki ijtimoiy tarmoqlardagi sahifalarda e’lon qilinib, soliq hisobotlarida aks ettirilishi zarur bo‘ladi. 

Qonunda fuqarolar, shu jumladan ko‘ngillilar tomonidan homiylik xayriyalarini yig‘ishning ham aniq tartibi belgilanmoqda.

Bunda jismoniy shaxslar faqat o‘zi yoki yaqin qarindoshi manfaatida xayriya yig‘ishi mumkin bo‘ladi. Ko‘ngillilar o‘ziga begona bo‘lgan shaxslar uchun xayriya yig‘ishda faqat e’lon berish bilan ko‘maklashishi mumkin. 

Ta’kidlanishicha, xayriya qutisi nodavlat tashkilotlar va boshqa homiylik qiluvchi yoki oluvchi yuridik shaxslar tomonidan o‘rnatiladi. Xayriya qutisi shaffof idish bo‘ladi va quti joylashtiriladigan manzil oldindan e’lon qilinadi. Uni ochishda guvohlar ishtirok etadi va bu jarayon videotasvirga olinib, jamoatchilikka e’lon qilinadi.

Homiylik to‘g‘risidagi qonunchilik talablarini buzganlik uchun ma’muriy javobgarlik belgilanmoqda. 
Qayd etilishicha, ushbu qonunga ehtiyoj xayriyalarni yig‘ish tartibining qonunchilikda aniq belgilanmaganligi sababli ayrim g‘araz niyatli shaxslar fuqarolar ishonchiga kirib, pul mablag‘lari va mol-mulkini asossiz qo‘lga kiritish holatlari ko‘p uchrayotganidan yuzaga kelgan. 

Avvalroq xayriya plastik kartasiga yig‘ilgan pullarni o‘g‘irlagan fuqarolarning javobgarlikka tortilgani bilan bog‘liq bir qator holatlar aniqlangandi.