Aydar-Arnasoy ko‘llari tizimida o‘nlab qoidabuzarliklar aniqlanib, yuzlab noqonuniy to‘rlar olib qo‘yildi. Bu haqda Ekologiya vazirligi xabar berdi.
Maʼlum qilinishicha, 2025-yilning yanvar-fevral oylarida 125 ta reydlar o‘tkazildi.
Reydlar davomida 94 ta qoidabuzarlik qayd etilgan. Jami jarimalar miqdori 423 mln so‘mni, tabiatga yetkazilgan zarar esa 28 mln 136 ming so‘mni tashkil etdi.
Shuningdek, 26—28-fevral kunlari Aydar-Arnasoy ko‘llari hududida suvda qolib ketgan noqonuniy baliq ovlash to‘rlarini bartaraf etish bo‘yicha reyd o‘tkazildi.
Natijada Navoiy viloyatidagi Aydarko‘ldan har biri 100 metr uzunlikdagi 100 dona, Tuzkon ko‘lidan har biri 100 metr uzunlikdagi 70-80 dona, Arnasoy ko‘lidan esa har biri 100 metr uzunlikdagi 50-60 dona to‘r olib tashlandi.
Avvalroq Aydar-Arnasoy ko‘llarida 2024-yili noqonuniy ov oqibatida tabiatga 1,7 mlrd so‘mlik zarar yetkazilgani haqida xabar berilgandi. Navoiyda noqonuniy baliq ovlagan shaxslar tabiatga 6,3 mlrd zarar yetkazgani haqida xabar berilgandi.
Shuningdek, Surxondaryo viloyati Sho‘rchi tumanida noqonuniy baliq ovlanishi natijasida tabiatga 1,4 milliard so‘m zarar yetkazilgan edi.
Izoh (0)