Joriy yilning 8-avgust kuni Senatning Orolbo‘yi mintaqasini rivojlantirish masalalari va ekologiya qo‘mitasi raisi Boriy Alixonov rahbarligidagi ishchi guruh Jizzax viloyatida atrof-muhit musaffoligi va ekologik barqarorlikni ta’minlash, jumladan, “Yashil makon” umummilliy loyihasi doirasida amalga oshirilayotgan ishlar, chiqindilarni to‘plash, saralash va qayta ishlash bo‘yicha ko‘rilayotgan choralar, shuningdek, oqova suvlarni tozalash bo‘yicha bajarilayotgan ishlar bilan tanishdi. Bu haqda Oliy Majlis Senati xabar qildi.
Qayd etilishicha, dastlab viloyat hokimligida hokimlik mas’ullari, mutasaddi korxona va tashkilotlar vakillari ishtirokida Aydar-Arnasoy ko‘llar tizimidagi muammolar, chiqindilarni qayta ishlash va utilizatsiya qilish hamda “Yashil makon” umummilliy loyihasi bo‘yicha uchrashuv tashkil etilgan.
Shu kunning o‘zida viloyat ekologiya boshqarmasida Koreyaning “Techcross water&energy” kompaniyasi vakillari bilan uchrashuv o‘tkazilgan. Unda Jizzax shahrida hosil bo‘ladigan oqova suvlarni tozalash masalalari muhokama qilingan. Kompaniya tomonidan amalga oshirilishi rejalashtirilgan qiymati 17 million dollar bo‘lgan oqova suvlarni tozalash inshooti qurilishi yuzasidan ma’lumoti tinglanib, tegishli taklif va tavsiyalar berilgan.
Shuningdek ishchi guruh vakillari Maishiy chiqindilar saralash stansiyada tashkil qilingan ishlar bilan tanishgan.
Ma’lum bo‘lishicha, poligonga Jizzax shahri va uchta tumandan kuniga 400 tonnadan ziyod chiqindi olib kelinadi. Senator so‘zlariga ko‘ra, hozirgi vaqtda poligonda qariyb 3,5 million tonna chiqindi yig‘ilib qolgan. Poligonda chiqindilarni joylashtirish va sanitar talablarga rioya etish yetarli darajada yo‘lga qo‘yilmagan.
Bundan tashqari, ishchi guruh vakillarining zaharli kimyoviy vositalar chiqindilari ombori mas’ullari bilan uchrashuvi ham o‘tkazilgan. Suhbat jarayonida zaharli kimyoviy moddalarning inson sog‘lig‘i va atrof-muhitga zararli ta’sirini bartaraf etish, joylardagi zaharli kimyoviy va boshqa toksik moddalar ko‘milgan hamda saqlanayotgan maxsus obyektlarning xavfsiz holatda saqlanishini ta’minlash bo‘yicha ishlar yetarli darajada amalga oshirilmagani qayd etib o‘tilgan.
Dastlabki o‘rganishlar yakunida yo‘l qo‘yilgan xato va kamchiliklarni bartaraf etish bo‘yicha mas’ullarga tegishli tavsiya va ko‘rsatmalar berilgan. O‘rganishlar davom etmoqda.
Izoh (0)