Ekologiya, atrof-muhitni muhofaza qilish va iqlim o‘zgarishi vazirligining Aydar-Arnasoy ko‘llar tizimi davlat inspektorlari hamda Jizzax viloyat prokuraturasi xodimlari bilan hamkorlikda navbatdagi reyd tadbiri bo‘lib o‘tdi. Bu haqda vazirlik matbuot xizmati xabar berdi.
Ma’lum qilinishicha, Aydar-Arnasoy ko‘llar tizimi, Tuzkon bo‘limi hududida o‘tkazilgan reyd davomida tumandagi “Baxtli” MFY, “Navro‘z” qo‘rg‘onida yashovchi fuqaro Sh.M. tomonidan sanoatbop o‘lchamdan kichik bo‘lgan jami 175 bosh oqsila (“sudak”) baliqlari noqonuniy ravishda ovlangani aniqlangan.
Qonun buzilishi natijasida hayvonot dunyosiga 57 million 750 ming so‘m zarar yetkazilgan.
Ashyoviy dalil sifatida noqonuniy ravishda ovlangan baliq mahsulotlari hamda 1 dona “Progress” rusumli qayiq va 1 dona “YAMAHA-30” rusumli qayiq motorlari olib qo‘yilgan.
Ushbu holatda jinoyat alomatlari borligi sababli to‘plangan hujjatlar Jizzax viloyat prokuraturasiga yuborilgan.
- Bir necha kun oldin Jizzax viloyatida 541 ta baliq noqonuniy ovlanib, tabiatga 178 million 530 ming so‘m zarar yetkazilgani aniqlangandi.
- Ushbu hududda aprel oyida o‘tkazilgan reyd davomida elektr qarmoqlardan foydalangan holda noqonuniy baliq ovlayotganlar aniqlangandi.
- O‘shanda fuqarolardan biri xizmat vazifasini bajarayotgan xodimlarning qonuniy talablarini bajarmasdan, ularga faol qarshilik ko‘rsatib, noqonuniy ovlagan baliqlari va boshqa ashyoviy dalillarni yo‘q qilish maqsadida o‘zining Nexia-3 ni departament bo‘lim boshlig‘i ustiga haydab, uning hayoti va sog‘lig‘iga xavf tug‘dirish orqali tan jarohati yetkazgandi.
Izoh (0)